تراثنا السوداني جميل، وعندو مكانة كبيرة في وجداننا، الدخان، والكركار، والدلكة، كلها طقوس مرتبطة بالفرح، والعناية، والاهتمام بالنفس، والكلام الجاي ما دعوة لتركها، وإنما محاولة نفهم إنو جلد الوش مختلف عن جلد باقي الجسم، والفرق ده بيفرض طريقة مختلفة في التعامل معاه
خلونا نبدأ بالدخان، الدخان السوداني غالباً بيتحضر من أخشاب زي الطلح (Acacia seyal) والهجليج البري أو اللالوب البري (Terminalia brownii) وغيرها من الأخشاب العطرية، أثناء التبخير، الجلد بتعرض لحرارة عالية، مع تعرق شديد، ودخان مليان بجزيئات دقيقة ومركبات عضوية متطايرة
وفي دراسة منشورة سنة 2022، الباحثين لقوا إنو بعض المركبات الموجودة في دخان الأخشاب دي أظهرت دلائل على إحداث ضرر للمادة الوراثية في الاختبارات المعملية، باستخدام اختبارات معروفة زي Ames Test وComet Assay، ودي نتائج محتاجة تتاخد بجدية، حتى لو كانت ما معناها تلقائياً إنو كل جلسة دخان حتسبب نفس الضرر
لكن الأثر البنشوفو في العيادة أوضح من كدا، الحرارة العالية مع التعرق، والدخان، والاحتكاك، ممكن يهيجوا الجلد، ويعملوا حساسية تلامسية عند بعض الناس، وبعدها بجي التصبغ البستمر شهور، خصوصاً في البشرة السودانية البتستجيب للالتهاب بإنتاج كمية أكبر من الميلانين
أما الكركار، فقصتو مختلفة شوية، مكوناتو الأساسية غالباً بتشمل السمسم، والشحم، وشمع العسل، مع إضافات عطرية مختلفة حسب المنطقة والأسرة، المكونات دي ممتازة لترطيب جلد الجسم الجاف، لكن جلد الوش عندو غدد دهنية أكثر، ومسامات أكتر، وطبيعة مختلفة تماماً، عدد من المكونات دي عندها قابلية متوسطة لسد الفوهات، والقابلية دي بتزيد مع التسخين، أو مع تكرار الاستعمال، أو لو اتساب المنتج على الوش لفترات طويلة
وبنلقى الدلكة في نفس السياق، الدلكة السودانية، بمكوناتها المعروفة من الذرة المخمرة مع إضافات زي القرنفل، وقشر البرتقال، والصندل، اتعملت أساساً للجسم، الاحتكاك البتعملو بيساعد في إزالة الخلايا الميتة من المناطق السميكة، لكن جلد الوش أرق بكتير، والاحتكاك المتكرر عليه بيساهم في إنهاك الطبقة القرنية، ويخلي الحاجز الجلدي أضعف، وبالتالي يزيد التهيج والتصبغ عند الناس القابلين ليهو
وبرضو في مادة بنلقاها كثير في الوصفات الشعبية، وهي زيت جوز الهند، الزيت ده مرطب ممتاز للجسم والشعر عند ناس كتار، لكن على الوش عندو قابلية عالية نسبياً لسد الفوهات، عشان كدا غالباً بنتجنب استعمالو في البشرة الدهنية أو المعرضة لحب الشباب
بعد ما عرفنا كل الأسباب البتخلي المسام تظهر بصورة أوضح، بيبقى السؤال المنطقي هسة:
نعمل شنو ؟ وده موضوع الجزء الأخير من السلسلة بكره
#حكاية_المسام_الواسعة
#عيادات_بيت_العافية
#عيادة_الجلدية_أون_لاين