في ناس أول ما يحاولوا يوقفوا الخلطة، الوش بحمر، ويحرق، ويقشر، والحبوب بتطلع بصورة أعنف من الأول، الإحساس الطبيعي بقول إنو المشكلة كانت في وقف الكريم، لكن الحقيقة بتكون العكس تماماً، الوش بكون وصل لمرحلة اسمها Topical Steroid-Damaged Face (TSDF)، يعني الجلد بقى معتمد على الستيرويد بعد سنين من الاستعمال، وكل محاولة للانسحاب بتكشف حجم الضرر المتراكم تحت السطح
المشكلة دي ما بتحصل في يوم ولا أسبوع، هي قصة بتتكتب بصمت، شهر ورا شهر، وسنة ورا سنة، في بداية السلسلة شبهنا الجلد بخيمة، والكولاجين والإيلاستين بالأعمدة البتشيلها، يلا مع الاستعمال الطويل للستيرويدات القوية، الأعمدة دي بتبدأ تضعف تدريجياً، الطبقة الخارجية من الجلد بترق، والطبقة العميقة برضو بتفقد جزء من سماكتها، والكولاجين بقل، فيبقى الجلد أرق، وأضعف، وأقل قدرة على تحمل أي مؤثر خارجي، وعشان الدعامة بقت أضعف، المسام بتظهر بصورة أوضح من أي وقت فات
لكن دي بداية القصة يدوب، الأوعية الدموية الدقيقة البتكون مختفية تحت الجلد بتبدأ تظهر للعين، وتبقى خيوط حمراء رفيعة ماشّة في الخدود والأنف، السبب إنو الستيرويد لفترة طويلة بيغيّر طريقة انقباض وتمدد الأوعية، ولمن تأثيرو يختفي بتحصل حالة ارتداد، فتتمدد الشعيرات بصورة واضحة، ودي واحدة من العلامات البتميز الوش المتأذي بالستيرويد
وبرضو الجلد ببقى سريع الاحمرار، حر بسيط، شاي ساخن، انفعال، أو حتى غسل الوش، كلها حاجات ممكن تخلي الاحمرار يزيد بصورة مزعجة، ومرات بتظهر حالة شبيهة بالوردية، أو طفح حول الفم، رغم إنو الشخص عمره ما كان عنده المشاكل دي قبل استعمال الخلطة
وفي تغيير تاني بستغربوا منو ناس كتار، الزغب الناعم في الخدود والذقن بزيد، ويبقى أوضح من الأول، الستيرويد الطويل بقدر يحفز نمو الشعر الدقيق، فيلقى الزول نفسو قدام مشكلة جديدة ما كانت في حسابو
ومع الجلد الرقيق، والمناعة الموضعية الضعفت، بقت البيئة مناسبة لظهور ثوران شبيه بحب الشباب، أو طفح يشبه الوردية، وفي بعض الحالات بيلقى الديمودكس الفرصة المناسبة عشان يتكاثر، ويرجع يزيد الالتهاب فوق الالتهاب
وأحياناً، بعد سنوات من استعمال الخلطات المحتوية على هيدروكينون بتركيزات عالية، بتظهر مضاعفة مختلفة تماماً، وهي الأوكرونوسيس الخارجي (Exogenous Ochronosis)، الجلد هنا بدل ما يفتح، بيميل للون الأزرق الرمادي أو الأسود المزرق، ومعاه حبيبات صغيرة دقيقة تشبه حبيبات الكافيار، الحالة دي أقل شيوعاً من بقية المضاعفات، لكنها من أصعبها في العلاج
ولمن طبيب الجلدية يعاين الحالات دي بعدسة الجلد، بيلقى علامات بقت معروفة: ترقق واضح في الجلد، وشعيرات دموية دقيقة، وفتحات جريبية متوسعة، وأحياناً آثار للديمودكس، وفي مراكز متخصصة بقى في مقياس اسمو DATS Score بساعد في تقدير شدة الضرر ومتابعة التحسن مع العلاج
طيب هل الحل إنو نوقف الخلطة فجأة؟
الإجابة بتختلف من حالة للتانية، في ناس بقدروا يوقفوها مباشرة، وفي ناس بحتاجوا خطة انسحاب تدريجية تحت إشراف طبي، لأن الارتداد مرات بكون شديد، وخلال الفترة دي الطبيب غالباً بركز على إعادة بناء الحاجز الجلدي بمرطبات غنية بالسيرامايد، وقد يستعمل أدوية زي Tacrolimus أو Pimecrolimus لتخفيف الالتهاب، وأحياناً Doxycycline إذا كان في التهاب شديد أو صورة شبيهة بالوردية، ولو كان الديمودكس جزءاً من المشكلة، ممكن يدخل Topical Ivermectin ضمن الخطة العلاجية
وأهم جزء في العلاج هو الصبر، لأن الجلد الاتأذى خلال سنين، بحتاج شهور عشان يبدأ يبني أعمدتو من جديد، ولو كانت حكاية الستيرويدات معروفة عند طبيب الجلدية، ففي ممارسات ثقافية تانية منتشرة بيناتنا، تستحق وقفة هادئة بعيداً عن اللوم، وده موضوع البوست الجاي
#حكاية_المسام_الواسعة
#عيادات_بيت_العافية
#عيادة_الجلدية_أون_لاين