الخلطة في العلبة

في دراسة حللت كريمات التفتيح المتداولة في السوق السوداني، كان فيها متوسط تركيز الهيدروكينون حوالي ٥.٧٪، يعني تقريباً ثلاثة أضعاف الحد المسموح بيهو سابقاً بدون وصفة (٢٪)، وحتى التركيز ده ذاته بقت حواليه محاذير كثيرة في دول كتيرة

لكن قبل أي حاجة، خلوني أقول حاجة مهمة، مفهوم السعي لبشرة منوّرة، صافية، ولونها متوحد، الرغبة دي في حد ذاتها ما عيب، والفطرة بتميل ليها في كل الثقافات، المشكلة كلها في الوسيلة، لأن التراكيب البتتباع تحت اسم "خلطة" أو "كريم تفتيح" غالباً ما بتكون كريم واحد بسيط، وإنما خليط من مواد قوية جداً، اتجمعت مع بعض من غير رقابة، ولا ضمان لتركيزها، ولا معرفة كاملة بعواقبها

وللأسف، الظاهرة دي ما نادرة، في ولاية الجزيرة، دراسة منشورة سنة 2016 لقت إن74.4% من النسوان استعملن كريمات التفتيح، وبعدها بسنين، دراسة في مستشفى الخرطوم التعليمي بين 2019 و2020 وجدت نسبة وصلت إلى 85.8%، والأغرب من كده إنو استعمال الخلطات داخل الأسرة بلعب دور كبير؛ لو الأم أو الأخت بتستعملها، احتمال إنو البنت تستعملها بزيد حوالي ثمانية مرات تقريباً، يعني القصة بتبدأ من رف الحمام في البيت

في كتير من العينات اتلقى وجود Clobetasol propionate 0.05% أو Betamethasone، ودي من أقوى الستيرويدات الموضعية المعروفة، أدوية اتعملت أصلاً لعلاج أمراض جلدية محددة وتحت إشراف طبي، ما عشان تتمسح يومياً على وش سليم لشهور وسنين

ومع الستيرويد، غالباً بيكون في Hydroquinone بتركيزات عالية، وأحياناً أعلى بكتير من المكتوب على العلبة، وفي بعض المنتجات وُجدت مركبات الزئبق غير العضوي، ودي مادة سامة للكلى والجهاز العصبي، بينما مرات تضاف مواد أقل خطورة زي Kojic acid أو Arbutin، لكن وجودها ما بيلغي خطورة بقية المكونات

الستيرويد هنا شغال كأنو معول داخل الخيمة، بدل ما يقوي الأعمدة البتشيل الجلد، ببدأ يهدمها حبة حبة، الجلد برق، والكولاجين بقل، والدعامة البتشيل فتحة المسام بتضعف، فتظهر المسام أكبر وأوضح، أما الهيدروكينون، فمع الاستعمال الطويل والعشوائي، ممكن يعمل مفارقة غريبة؛ بدل ما يفتح اللون، حيسبب تصبغ عكسي عنيد في بعض الناس، فيبقى الجلد أغمق في بقع معينة، والمسامات أوضح من الأول

من المهم نفهم الآثار السلبية دي، وده موضوع البوست الجاي

#حكاية_المسام_الواسعة

#عيادات_بيت_العافية

#عيادة_الجلدية_أون_لاين