بنفتكر أحياناً إنو في كريم بقدر "يقفل المسام"، وإنو بعد أسبوع ولا أسبوعين الوش حيبقى ناعم كأنو المسام اختفت، الفكرة دي منتشرة جداً، ويمكن تكون أكبر سبب للإحباط بعد بداية أي علاج، الحقيقة البنعتمد عليها في الجلدية بسيطة، لكنها مهمة جداً، وهي القاعدة الذهبية في علاج المسام الواسعة:
المسام ما بتتقفل، نحن بنخليها أقل ظهوراً
وده لأنو المسام جزء من تشريح الجلد ذاته، زي نافذة صغيرة بتطلع منها الشعرة، وبتوصل الزهم من الغدة الدهنية لسطح الجلد، عشان كدا العلاج هدفو تغيير الظروف الحول الفوهة، ما إزالة الفوهة نفسها
وعلى مدار السلسلة اتكلمنا عن الأسباب المختلفة للمسام الواسعة؛ مرة المصنع الزيتي بكون شغال بطاقة أعلى، ومرة الدعامة تحت الجلد بتضعف، ومرة السبب بكون حب شباب قديم، أو عوامل هرمونية، أو بيئية، أو حتى استعمال خلطات، عشان كدا العلاج بركز على أربعة أهداف واضحة:
أول هدف هو تقليل إفراز الزهم، لأنو كل ما ضغط الزيت داخل الفوهة يقل، شكل المسم بظهر أهدأ
وثاني هدف هو تنظيف الفوهة من الزهم المتأكسد والخلايا الميتة، لأن المحتويات دي بتخلي الفتحة تظهر أكبر وأغمق
وثالث هدف هو شد الدعامة الحول الفوهة، بإعادة تحفيز الكولاجين والإيلاستين في الحالات المناسبة، عشان التربة البتشيل فوهة النبع تستعيد جزءاً من قوتها
أما الهدف الرابع فهو تحسين سطح الجلد ككل، لأن السطح الأملس بخلي التباين حول المسام أقل، وبالتالي العين بتلاحظها بدرجة أقل
وعشان كدا برضو، العلاج بحتاج شوية صبر، بعض التغييرات بتبدأ تظهر بعد أسابيع، لكن النتيجة المرضية غالباً بتحتاج شهور، وبعد الوصول ليها بتجي مرحلة الصيانة، لأن البشرة كائن حي بتغير كل يوم، والمسام جزء من بنيتها الطبيعية، وعشان كدا أي إعلان بوعد إنو "المسام حتختفي في أسبوع"، يستحق نتعامل معاه بحذر شديد، لأن الوعود الكبيرة دي بتتجاوز طريقة شغل الجلد نفسه
ولو دايره تعرفي العلاج ماشي في الاتجاه الصاح، خليك بعيده من المرآة اليومية، لأنها بتخدع العين، صوري وشك مرة واحدة كل شهر، بنفس الإضاءة، ونفس المكان، ونفس الزاوية، المقارنة الشهرية غالباً بتوريكي التحسن بصورة أوضح من النظر كل صباح
في بداية السلسلة شبهنا المسام بفوهات نبع، نحن ما بنقدر نسد فوهة النبع، لكن بنقدر نقلل ضغط الموية الجواها، وننضف الفوهة، ونشد التربة الحولها، وساعتها النبع بظهر أهدأ بكتير، والعمود الأول في العلاج يبدأ بحاجات بسيطة بنعملها على الوش كل يوم، بتشتغل بصمت، وده موضوع البوست الجاي
#حكاية_المسام_الواسعة
#عيادات_بيت_العافية
#عيادة_الجلدية_أون_لاين