دراسة محلية اتعملت في المتمة لقت إن ثعلبة الشد (traction alopecia) موجودة وسط عدد كبير من النسوان، الدراسة ما بتمثل كل السودان، بس بتأكد إن المشكلة قريبة مننا وأكتر شيوعا من البنتخيل،
ثعلبة الشد بتحصل لمن الشعر والبصيلات يتعرضوا لسحب متكرر أو مستمر في الاتجاه ذاتو: ضفاير محكمة، وإضافات شعر تقيلة، وراستا، وذيل حصان أو كعكة مشدودة، وربطة ثابتة تحت الطرحة كل يوم، في البداية الضرر ممكن يكون من غير ندبة، واستمرار الشد لفترة طويلة ممكن يدمر البصيلات ويستبدلها بنسيج ليفي ما بنتج شعر من جديد
المشكلة غالباً ما بتبدأ بفراغ أملس كبير، الإشارات الأولى ممكن تكون وجع أثناء التضفير، ولسعة أو حرقان في الفروة، وصداع بعد التسريحة، وقشور أو حبوب صغيرة حول جذور الضفاير، وشعيرات مكسورة كتيرة عند المقدمة والصدغين، الألم أو الحرقان في فروة الراس بنسميهّو أحياناً ألم الفروة (trichodynia)، ووجودو ما بأكد التشخيص براهو، لكنو إنذار إن التسريحة ضيقة زيادة، الدراسة السودانية ذاتها سجلت تكسر الشعر، وحساسية الفروة، وألمها ضمن العلامات الموجودة عند المصابات
بعد فترة، خط الشعر ممكن يرق ويتراجع، خصوصاً عند المقدمة والصدغين، ومرات بتظهر علامة الهدبة (fringe sign): صف من الشعيرات القصيرة والناعمة بفضل موجود عند الحافة الأمامية، بينما المنطقة الوراهو خفت أو فضيت، العلامة دي قرينة مفيدة لثعلبة الشد، والتشخيص بحتاج برضو تاريخ التسريحات وفحص الفروة، ومرات الفحص المبكر للشعر والفروة (trichoscopy)، عشان نفرقها من أنواع تانية من فقدان الشعر، زي الثعلبة والتندب الأمامي
في المرحلة المبكرة، البصيلات بتكون لسه موجودة، وإيقاف الشد ممكن يسمح للشعر يرجع تدريجياً، والطبيب حسب الحالة ممكن يعالج الالتهاب أو التهاب البصيلات، ويضيف علاج مساعد للإنبات، أما لمن المنطقة تبقى ملساء ولامعة وتختفي فتحات البصيلات، فده برجح وجود ندبة، والعلاجات ما بتقدر ترجع بصيلة استبدلها النسيج الليفي، عشان كده التشخيص المبكر بفرق، ومرات زراعة الشعر بتكون هي الخيار الوحيد المتاح
الوقاية هنا هي الأساس: الضفيرة تكون فضفاضة من أولها، والإضافات أخف وأقصر، والشعيرات الصغيرة في المقدمة نخليها براها بدل جرّها بالقوة، نغيّر اتجاه الفرق ومكان الكعكة، وما نجمع الفرد الكيميائي مع تسريحة شادة، وتحت الطرحة نربط الشعر بخفة ونبدل مكان الربطة بدل ما الضغط يقعد فوق الصدغ ذاتو كل يوم
أي تسريحة بتلسع أو توجع تتفك أو تترخى طوالي، ما ننتظر الفروة «تتعود»، لأن اختفاء الوجع بعد يومين ما بأكد إن الشد بقى مأمون، ولو ظهرت قشور مستمرة، أو حبوب، أو فراغات، أو خط الشعر بدأ يتراجع، فالمراجعة الطبية تكون بدري قبال ما الضرر يتحول من مرحلة ممكنة الرجوع لندبة دائمة
ثعلبة الشد مثال واضح إن التسريحة ممكن تحمي ساق الشعرة وتضر البصيلة في الوقت ذاتو، الحماية الحقيقية بتخلي الأطراف محفوظة والفروة مرتاحة
وفي القسم الجاي من السلسلة حنبدأ قسم الصحة من الداخل، ونبدأ بالصدمات اللي ممكن تتسبب في تساقط الشعر زي الولادة والأمراض