أدوية بتوسّع المسام

في ناس بتبدأ دواء جديد، وبعد أسابيع قليلة يلاحظوا إنو الوش اتغيّر بصورة مفاجئة، الحبوب ظهرت بسرعة، المسام بقت أوضح، والجلد بقى دهني أكتر، رغم إنو الروتين اليومي ذاتو ما اتغير، وهنا السبب مرات بكون موجود داخل علبة الدواء نفسها

أوضح مثال على الحكاية دي هو الهرمونات الذكرية الخارجية (Anabolic Steroids أو Exogenous Androgens)، الرياضيين أو بعض الناس البستعملوها لأغراض علاجية أو غير علاجية ممكن يلاحظوا زيادة واضحة في إفراز الزهم، مع ظهور حبوب ومسام أوضح، لأن المصنع الدهني تلقى إشارات قوية تخليه يرفع الإنتاج

وبرضو في أدوية تانية معروفة بالتأثير ده، زي دواء الليثيوم (Lithium) المستخدم في بعض الأمراض النفسية، وبعض مضادات التشنجات (Anticonvulsants)، الثوران البتسببو الأدوية دي غالباً بشبه حب الشباب، لكن قصتو مختلفة، وأطباء الجلدية بسموه (Acneiform Drug Eruption)

حتى الكورتيزون عن طريق الفم، خصوصاً بالجرعات العالية، ممكن يظهر بعده ثوران Breakout يشبه حب الشباب خلال فترة قصيرة، وبيكون مختلف عن حب الشباب التقليدي في شكلو وطريقة ظهور الحبوب

وبالنسبة لبعض حبوب منع الحمل، فالأمر بيعتمد على نوع الهرمون الداخل في تركيبها، المستحضرات الغالبة فيها أنواع من الـ(Progestins) ذات تأثير أندروجيني أعلى ممكن تخلي البشرة أكثر دهنية عند بعض البنات، بينما أنواع تانية ممكن يكون تأثيرها معاكس تماماً

عشان كدا الطبيب لمن يسمع إنو الحبوب أو المسام ظهرت بصورة مفاجئة، واحد من أول الأسئلة البسألها: بدأت أي دواء جديد في الفترة الفاتت؟ السؤال ده مرات بيوصل للتشخيص أسرع من أي فحص

وبرضو هنا في نصيحة مهمة، أي ثوران جلدي جديد ظهر بعد بداية دواء، أو بعد تغيير جرعتو، يستحق مراجعة الطبيب المعالج أو طبيب الجلدية، في حالات كتيرة بكون الحل بتعديل الخطة العلاجية أو تبديل الدواء، أما إيقاف العلاج من نفسك فقد يسبب مشاكل أكبر من المشكلة الجلدية ذاتها

أخيرا في سكان تانيين معانا داخل الوحدة الشعرية الدهنية، وعندهم قصة طويلة مع الفوهة، وده موضوع البوست الجاي

#حكاية_المسام_الواسعة

#عيادات_بيت_العافية

#عيادة_الجلدية_أون_لاين