الديمودكس عايش في مسام أغلب الناس، المعلومة دي بتفاجئ ناس كتار، لأنو بمجرد سماع كلمة "طفيلي" الزول بتخيل إنو وجودو معناها مرض، لكن الحقيقة مختلفة شوية، الديمودكس واحد من السكان الطبيعيين للجلد، وعدد بسيط منو موجود عند معظم البالغين من غير ما يسبب أي مشكلة
في الحقيقة في نوعين بنشوفهم في الجلد البشري: (Demodex folliculorum) والبعيش غالباً داخل بصيلات الشعر، و(Demodex brevis) البقضي جزء كبير من حياتو داخل الغدد الدهنية، طول ما العدد متوازن، الجلد والساكنين ديل بكونوا عايشين في حالة هدوء، لكن القصة بتبدأ لمن الظروف تتغير
في الجزء الأول من السلسلة اتكلمنا عن المسام الواسعة، وكيف الفوهة الكبيرة بتوفر مساحة أكبر داخل الوحدة الشعرية الدهنية، واتكلمنا برضو في الجزء الرابع من السلسلة عن كريمات الكورتيزون القوية وكيف بتضعف مناعة الجلد الموضعية مع الاستعمال الطويل، اجتماع العاملين ديل بفتح الباب أمام الديمودكس عشان يتكاثر بصورة كبيرة، في الحالة دي، المشكلة ما وجود الديمودكس نفسه، لكن الزيادة الكبيرة في عددو، لأن الجلد ببدأ يتعامل مع التكاثر ده كعامل مهيج للالتهاب
النتيجة بتكون طفح جلدي بيشبه حب الشباب عند أول نظرة، مع حبوب صغيرة وبثور، وحكة شديدة عند بعض الناس، وانسدادات داخل الفوهات، وأحياناً إحساس مستمر بخشونة الجلد، عشان كدا في ناس بعالجوا نفسهم لشهور على إنو حب شباب، بينما السبب الحقيقي مختلف تماماً
وبرضو الديمودكس عندو علاقة بحالتين بنشوفهم كثير في العيادة، أولهم الوردية (Rosacea)، لأن زيادة أعداده ارتبطت بارتفاع نشاط الالتهاب في جزء من المرضى، وثانيهم التهاب الجلد الدهني (Seborrhoeic Dermatitis)، والحتة دي أعقد شوية، لأن الجلد في الحالة دي بكون بيستضيف كائن تاني اسمو (Malassezia)، الفطر ده بيفكك الزهم إلى أحماض دهنية حرة، والأحماض دي بتساعد على تهيج الجلد عند الناس القابلين للحالة، فبتلقى أكثر من عامل مجتمع داخل نفس الفوهة
لحسن الحظ، علاج الديمودكس بقى واضح في السنوات الأخيرة، من أنجح العلاجات كريم (Topical Ivermectin 1%)، ومعاه في حالات كثيرة كريم أو جل (Metronidazole)، والطبيب بحدد العلاج حسب التشخيص والحالة السريرية، لأن كل طفح شبيه بحب الشباب عندو قصة مختلفة
لكن في نوع تاني من المسام الواسعة، قصتو ما بدأت بطفيلي، ولا بكريم، ولا حتى بغدة دهنية، قصتو بدأت ببثرة قديمة انتهت، وخلت أثرها وراها، وده موضوع المنشور الأول من الجزء الجاي
#حكاية_المسام_الواسعة
#عيادات_بيت_العافية
#عيادة_الجلدية_أون_لاين