في مراجعة علمية جمعت نتائج ستين دراسة، الباحثين لقوا إنو حب الشباب كان موجود عند حوالي 43% من المصابات بتكيس المبايض، مقابل حوالي 21% في غير المصابات، الرقم ده بوضح إنو الجلد مرات بقدم إشارات مهمة عن الحاصل داخل الجسم
في البوستات الفاتت اتكلمنا عن المصنع الدهني، وكيف الحرارة، والشمس، والأكل، والنوم، والتوتر بقدروا يأثروا على طريقة شغلو، لكن في بعض الحالات، أوامر التشغيل بتجي من مكان أعمق، من الجهاز الهرموني نفسه
متلازمة تكيس المبايض (PCOS) أو بإسمها الجديد متلازمة المبيض الأيضية متعددة الغدد الصماء (PMOS)هي من أكثر اضطرابات الهرمونات شيوعاً عند السيدات في سن الإنجاب، وجزء كبير من قصتها ببدأ بمقاومة الإنسولين، الجسم بفرز إنسولين بكميات أعلى عشان يحافظ على مستوى السكر، والإنسولين المرتفع بحفز خلايا موجودة في المبيض اسمها (Theca Cells)، فتبدأ تنتج كميات أكبر من الهرمونات الذكرية أو الأندروجينات، الإشارات الهرمونية دي بتمشي مباشرة للمصنع الدهني، فيزيد إفراز الزهم، وتظهر الحبوب بصورة أوضح، خصوصاً في الفك وأسفل الوجه
وبرضو الأندروجينات عندها تأثير تاني اتكلمنا عنو في الجزء الأول من السلسلة، هي بتحول جزء من الشعر الناعم (Vellus Hair) إلى شعر خشن (Terminal Hair)، ومع كبر حجم البصيلة، الفوهة ذاتها بتحتاج مساحة أكبر، وبتظهر المسام بصورة أوضح، خاصة في منطقة الذقن والفك
عشان كدا في عنقود معين من العلامات، طبيب الجلدية بوقف عندو باهتمام، مسام واضحة في الفك، مع حب شباب عميق أو كيسي، مع زيادة في الشعر الخشن في مناطق غير معتادة، مع اضطراب في الدورة الشهرية، اجتماع العلامات دي بيعتبر "علامة حمراء red flad" بتستحق تقييم هرموني، لأن الجلد هنا قاعد يحكي قصة أكبر من البشرة نفسها
التقييم غالباً ببدأ بفحوصات للهرمونات، زي (Total Testosterone) و(Free Testosterone) و(DHEAS)، ومعاها نسبة (LH/FSH)، وتحليل (17-Hydroxyprogesterone)، وقياس السكر والإنسولين أثناء الصيام، وفي حالات كثيرة بعمل الطبيب موجات صوتية على المبيضين حسب الحالة
ولو اتأكد التشخيص، فالعلاج بكون موجه للسبب الأساسي، ما للجلد بس، وحسب حالة كل زولة، الطبيب ممكن يختار أدوية زي (Spironolactone) لتقليل تأثير الأندروجينات، أو (Metformin) لتحسين مقاومة الإنسولين، أو بعض حبوب منع الحمل المناسبة (Combined Oral Contraceptives) للمساعدة في إعادة التوازن الهرموني
والخبر المطمئن إنو تكيس المبايض من الحالات الشائعة، والتعامل معاه بقى أوضح بكثير من زمان، الفحص الهرموني خطوة عملية لفهم السبب، وبداية لخطة علاجية مناسبة، وما عندو أي علاقة بوصمة أو مبالغة في القلق
ولو رجعنا لاستعارة المصنع، فالأوامر المرة دي جاية من غرفة التحكم المركزية في الجسم، والمصنع ببساطة بينفذ التعليمات البتوصلو، وفي أوامر تانية بتجي للمصنع من خارج الجسم، من الأدوية، وده موضوع البوست الجاي
#حكاية_المسام_الواسعة
#عيادات_بيت_العافية
#عيادة_الجلدية_أون_لاين