المرهم الأسود بتاع زمن، الكانت حبوباتنا بمسحو على الجروح والحبوب والدمامل، لسه بستخدمو الأطباء في القرن الواحد والعشرين، والسر فيهو علم حديث ما مجرد حنين للزمن الجميل
اسمو الطبي Ichthammol، أو Ammonium Bituminosulfonate، وده مركب قديم جداً عندو تاريخ استخدام بصل لحوالي مية وتلاتين سنة، أصله مستخلص من صخور غنية بالأحفوريات في النمسا، وبعد المعالجة بطلع لينا المرهم الأسود المعروف بريحتو ولونو وتقلتو على الجلد
المرهم ده ما مجرد "حاجة بتسحب الوسخ" زي ما الناس بتقول، التعبير الشعبي قريب من الإحساس، بس التفسير العلمي أدق، الإكثامول فيهو مركبات كبريتية عندها خصائص مضادة للالتهاب ومضادة للبكتيريا، وبتقدر تهدّي جزء من الإشارات الالتهابية داخل الجلد، زي الـ leukotrienes وبعض الـ cytokines، وهي مواد المناعة البتخلي الحبة الحمراء العميقة تلتهب وتوجع وتتملي قيح
عشان كده مكانو الحقيقي ما الحبوب الصغيرة السطحية، ولا الرؤوس السوداء والبيضاء، مكانو الأذكى هو الحبة الكبيرة العميقة المؤلمة، العقدة أو الكيسة، البتطلع فجأة في الذقن أو الخد أو الظهر، وتكون حمراء وساخنة ومؤلمة كأنها معلنة حالة استنفار جوة الجلد
في العيادة، أحياناً بنحقن الكورتيزون بكمية صغيرة جداً جوة الآفة العميقة عشان نطفئ الالتهاب بسرعة، بس في ناس كتار ما بقدروا يصلوا للعيادة في الوقت المناسب، أو يكونوا في بلد بعيد، أو الحبة طلعت في نهاية الأسبوع قبال مناسبة، هنا المرهم الأسود ممكن يكون حل وسط ممتاز، ما بديل دائم للطبيب، لكن إسعاف عملي للحبة الكبيرة العميقة
طريقة استخدامو مهمة، ما نمسحو زي كريم عادي على كامل الوش، هو علاج موضعي على نقطة محددة، بنخت كمية صغيرة على العقدة نفسها بالليل، وبعدها نغطيها بشاش صغير أو بلاستر، يعني نعمل ليها ضمادة مقفولة، ونخليها من تمانية لاتناشر ساعة، الفكرة إنو الدواء يفضل ملاصق للمنطقة طول الليل، ويهدي الالتهاب ويساعد القيح إمّا ينضج ويتفرغ بطريقة طبيعية، أو يقل الالتهاب وتختفي العقدة خلال يومين أو تلاتة
التركيزات بتفرق، تركيز 10% ممكن يكفي للحالات الأخف، 20% للحبوب الأقوى، و50% بنخليه للعقد الكبيرة العميقة البتحتاج تأثير أوضح، في السودان غالباً بتلقوه بأسعار رخيصة في صيدليات كتيرة، بأسماء زي Ichthopur أو Tafalbed أو Pull-Drwn، ودي واحدة من ميزاتو الكبيرة: متوفر، رخيص، وما محتاج تعقيد
بس عندو عيوب برضو، لونو الأسود ببقع الملابس والملايات والمخدات بسهولة، عشان كده الأفضل تستعمل منشفة قديمة فوق المخدة وقت الاستعمال، ريحتو برضو ما لطيفة، وما مناسب تمشي بيهو شغل أو جامعة، واستعمالو على جرح مفتوح ما صاح، ولا على بثرة صغيرة سطحية، لأن ده بكون مبالغة وتهييج ساكت
والأهم: لو الحبوب العميقة دي بتتكرر كتير، أو بتترك ندبات، أو بتطلع ككتل مؤلمة كل شهر، المرهم الأسود ما كفاية، دي علامة إن الخطة العلاجية نفسها محتاجة تتغير، لأن هدفنا ما نطارد كل عقدة بعد ما تظهر، هدفنا نقلل ولادتها من الأساس
وقبال ما نقفل قسم العلاجات الموضعية، لازم نتحدث عن المنظومة الكاملة: الغسول، المرطب، وواقي الشمس، لأن بدونها حتى العلاج الصحيح ممكن يفشل، وده الحنتناولو بالمنشور القادم
#حكاية_حب_الشباب #عيادات_بيت_العافية #عيادة_الجلدية_أون_لاين