منظومة العناية اليومية: الغسول، المرطّب، وواقي الشمس

ما في أدوية في الدنيا حتشتغل كويس على بشرة بتُغسل بصابون لوكس، وتترطب بفازلين، وتمشي للشمس بدون واقي، علاج حب الشباب ما كريمات براها، هو منظومة كاملة، ولو واحدة من حلقاتها مكسورة، باقي الخطة بتتعب معاها

أول حلقة هي الغسول، ودي من أكثر الحتات البتلخبطو فيها الناس، لأن في اعتقاد قديم إن البشرة الدهنية محتاجة صابون قوي ينشفها كلو كلو، بينما الحقيقة هي إنو الصابون القلوي، حتى لو خلى الوش يحس بالنضافة في اللحظة الأولى، ممكن يكسر الحاجز الطبيعي للبشرة ويزود الجفاف والتهيج، وبعدها الجلد يرد بإفراز دهون أكتر

الغسول المناسب لحب الشباب لازم يكون لطيف، خالي من الصابون، من نوع syndet، ودرجة حموضتو قريبة من الجلد الطبيعي، حوالي 4،5 إلى 5،5، يعني ينضف من غير ما يعمل معركة، ومن الخيارات العملية Cetaphil Gentle، وCeraVe Hydrating Cleanser، وLa Roche-Posay Toleriane، الاستعمال مرتين في اليوم كفاية، صباح ومساء، بمويه فاترة ما ساخنة، وبدون ليفة ولا فرشاة ولا كشط، لأن الدعك في البشرة السمراء بدل ينضف الحبوب، بفتح باب للتصبغ

أما لو الحبوب في الضهر والصدر، فهنا ممكن نحتاج غسول علاجي أقوى شوية، زي Salicylic Acid 2% أو BPO 4%، لأن المساحة أكبر والجلد أسمك وبتحمل أكثر من الوش، لكن برضو بدون عنف، وبزمن قصير على الجلد ثم شطف كويس

الحلقة التانية هي المرطب، ودي كلمة ناس كتار بستغربوا منها: "أنا بشرتي دهنية، أرطبها ليه؟" لأن المرطب هنا ما معناهو نخت زيت على الوش، معناهو نصلح الحاجز الواقي عشان الجلد يتحمل العلاج، الريتينويد والبنزويل بيروكسيد والأحماض كلها ممكن تنجح أو تفشل حسب قدرة البشرة على التحمل

المرطب المناسب مفروض يكون خفيف، غير مسد للمسام، مكتوب عليه non-comedogenic، وفيهو مواد زي ceramides أو niacinamide أو hyaluronic acid، أمثلة كويسة: CeraVe AM أو PM، وCetaphil Daily Hydrating، وNeutrogena Hydro Boost، البنتجنبو في حب الشباب هو زيت جوز الهند، والـ lanolin، والـ isopropyl myristate، والفازلين على الوش، لأن الحاجات دي ممكن تكون تقيلة وبتسد المسام عند ناس كتار، خصوصاً في الحر والرطوبة، إلا إذا كان في داعي طبي زي علاج الركيوتان مثلا،

أحسن وقت للمرطب بعد الغسول بدقيقتين، لمن البشرة تكون لسه رطبة شوية لكن ما مبللة، صباح ومساء، ومرات بنستعمله كطبقة حماية قبل العلاج أو بعدو، حسب حساسية البشرة

لكن أهم خطوة في البشرة السمراء هي واقي الشمس، عشان التصبغ، أي حبة تلتهب وبعدها تتعرض للشمس، عندها فرصة أكبر تخلي بقعة داكنة تقعد شهور، ودي بالضبط الحاجه البتوجع أصحاب البشرة الداكنة

القاعدة إنو واقي الشمس SPF 30 أو أعلى، يومياً، حتى لو الجو غايم، وحتى لو الزول جوه مكتب، لأن الضوء والحرارة والتعرض المتكرر كلها بتغذي التصبغ، ومع الريتينويد أو الدوكسيسيكلين بنفضل SPF 50 أو أعلى، لأن الجلد بكون أكثر حساسية للشمس

المشكلة العملية عند البشرة السمراء هي الـ white cast، البياض الرمادي البخلي الوش كأنو عليه طباشير، عشان كده الواقيات الملونة أو المصممة للبشرة الداكنة بتكون ألطف شكلاً، زي Black Girl Sunscreen، وBolden SPF، وEltaMD UV Daily Tinted، وLa Roche-Posay Anthelios Mineral Tinted، الفلاتر المعدنية زي Zinc Oxide وTitanium Dioxide غالباً ألطف للبشرة الحساسة، لكن ممكن تترك بياض، الفلاتر الكيميائية أخف وأسهل يومياً، لكنها ممكن تهيج بعض البشرات

كمية الواقي مهمة برضو، أغلب الناس بستخدموا ربع الكمية المطلوبة، للوش محتاجين تقريباً ملعقة شاي صغيرة كاملة، وإعادة كل ساعتين لو في شمس مباشرة أو تعرق أو مشوار طويل، وممكن تراجعوا سلسلة (حكاية الشمس والبشرة) لأدق تفاصيل الوقاية من الشمس،

الروتين العملي بسيط: صباحاً غسول، بعدو مرطب، بعدو واقي شمس، ولو في علاجات موضعية بتدخل حسب الخطة، ومساءً غسول، بعدو العلاج زي retinoid أو BPO أو azelaic acid، وبعد حوالي عشرين دقيقة مرطب فوقو لو البشرة بتتهيج

والآن بعد وصلنا لنهاية العلاجات الموضعية، نجي للحالات اللي ما تستجيب، بنخش للعلاج الفموي، وحنبدأ بالأكثر استخداماً والأكثر سوء فهم: المضادات الحيوية

#حكاية_حب_الشباب #عيادات_بيت_العافية #عيادة_الجلدية_أون_لاين