في دوا اسمو دابسون، اتطور أصلاً قبل عشرات السنين لعلاج الجذام وبعض الأمراض المعدية التانية، لكن بقى واحد من أكثر العلاجات الموضعية إثارة للاهتمام في حب الشباب، وعشان نفهم ليه، مفروض نتذكر أن الالتهاب هو اللاعب الأساسي في كثير من الحالات، خصوصاً عند البتظهر عندهن حبوب حمراء مؤلمة في منطقة الفك والذقن رغم استعمال العلاجات المعتادة
هنا بجي دور الـ Dapsone، المعروف تجارياً باسم Aczone بتركيز 5% أو 7،5%، فهو عندو تأثير مضاد للبكتيريا، لكن دي ما أهم نقطة في القصة، أهم حاجة إنو يعتبر واحد من أقوى مضادات الالتهاب الموضعية المستخدمة في حب الشباب، الدواء ده بثبط نشاط الخلايا العدلية (Neutrophils)، وهي واحدة من أهم خلايا المناعة المسؤولة عن إشعال الالتهاب داخل البصيلة، كأنو بدل ما يحارب الجنود الموجودين في المعركة بس، بمشي يهدي قوات الطوارئ نفسها ويمنعها من المبالغة في الرد
عشان كده فعالية الدابسون ما بتظهر بأفضل صورة في الرؤوس السوداء والكوميدونات، وإنما في الحبوب الالتهابية الحمراء والصديدية، فأكثر فئة بتستفيد منو هي النساء البالغات بين 25 و45 سنة، خصوصاً البعانوا من حب شباب متكرر في منطقة الفك وأسفل الخدين والذقن، وبرضو بكون خيار ممتاز للناس الجربوا الريتينويدات مع البنزويل بيروكسيد وما وصلوا للنتيجة المطلوبة، أو الما دايرات علاجات هرمونية وما عندهن رغبة في تناول أدوية فموية طويلة المدى
من ناحية الفعالية، الدراسات بتورينا إن التحسن عادة ببدأ خلال أربعة إلى ثمانية أسابيع، فهو ما أسرع دواء في العالم، لكنه من الأدوية البتكسب معركة الاستمرارية، والميزة الجميلة إنو غالباً ألطف على الجلد من كثير من العلاجات الموضعية التانية، الجفاف والتقشير والاحمرار الشديد أقل بكثير مقارنة ببعض الريتينويدات
طريقة الاستعمال عادة بتكون مرتين يومياً للجل 5%، بينما بعض تركيزات 7،5% ممكن تستخدم مرة واحدة يومياً حسب الخطة العلاجية، والكمية المطلوبة صغيرة؛ طبقة رقيقة على كامل المنطقة المعرضة للحبوب، ما على الحبة نفسها فقط
بس خلوا بالكم، لو استعملت الدابسون والبنزويل بيروكسيد فوق بعض في نفس الوقت، ممكن الجلد والشعر الخفيف حول المنطقة يكتسب لون أصفر أو برتقالي بصورة مؤقتة، عشان كده القاعدة الذهبية هي الفصل بينهما، مثلاً الدابسون صباحاً والبنزويل بيروكسيد مساءً، أو العكس، أما لو حصل التلطخ البرتقالي بالخطأ، فغالباً بختفي بعد الغسيل بمنظف لطيف أو مع الوقت خلال فترة قصيرة
أما من ناحية الأمان، فالدابسون من الخيارات المريحة نسبياً، الامتصاص من الجلد قليل جداً مقارنة بالحبوب الفموية، والبيانات المتوفرة مطمئنة أثناء الحمل لدرجة إنو كثير من المراجع الحديثة بتعتبره من الخيارات المقبولة عند الحاجة، وبرضو يمكن استخدامه أثناء الرضاعة الطبيعية بحذر وتحت إشراف طبي
المشكلة الحقيقية الوحيدة حالياً هي التوفر، الدواء ما زال نادر نسبياً في السودان، وغالباً بجي عن طريق الاستيراد، عشان كده كثير من المرضى بسمعوا بيهو أكتر مما بشوفوه في الصيدليات
وعندنا فئة كاملة من العلاجات الموضعية الأبسط، بعضها متاح بدون وصفة، وبعضها مدرسة قديمة، لكنها لسه عندها مكانها في بعض الحالات، ودي قصة البوست الجاي
#حكاية_حب_الشباب #عيادات_بيت_العافية #عيادة_الجلدية_أون_لاين