طوال السلسلة كنا بنتكلم عن البصيلة، والبكتيريا، والالتهاب، والانسداد، لكن في لاعب كبير واقف وراء الستار طول الوقت: الهرمونات، عشان كده لسنوات طويلة كان الأطباء بستعملوا علاجات هرمونية لبعض النساء البالغات، لأنهم عارفين إنو جزء من المشكلة أصلاً ببدأ من تأثير الأندروجينات على الغدد الدهنية، لكن كان في مشكلة واضحة: العلاجات الهرمونية الفموية عندها آثار جانبية ومحاذير كثيرة، وما بتنفع لكل الناس
هنا ظهر الـ Clascoterone 1%، المعروف تجارياً باسم Winlevi، والناس اعتبروه أكبر آلية علاجية جديدة لحب الشباب خلال أكثر من أربعين سنة، فكرتو بسيطة وسمحة في نفس الوقت،
بدل ما نغير هرمونات الجسم كلها، ليه ما نقفل تأثير الهرمون داخل الجلد فقط؟
الكلاسكوترون بشتغل كمنافس لهرمون DHT على مستقبلات الأندروجين الموجودة داخل الغدد الدهنية، بمعنى إنو الإشارة الهرمونية البتأمر الغدة بإنتاج كمية أكبر من الزهم بتلقى الباب مقفول قدامها، ودي نقطة مختلفة تماماً عن الريتينويدات، التريتينوين والأدابالين بشتغلوا أساساً على تنظيم انسلاخ الخلايا داخل البصيلة وتقليل الانسداد والالتهاب، أما الكلاسكوترون فبشتغل أعلى السلسلة، في المنبع الهرموني نفسه
إذا قارنا الفعالية بصورة مباشرة، فالريتينويدات لسه متفوقة شوية في تقليل العدد الكلي للحبوب، خصوصاً الرؤوس البيضاء والسوداء والكوميدونات، عشان كده ما زالت تعتبر الخط الأول في معظم المرضى، لكن الكلاسكوترون عندو ميزة مختلفة
أولاً هو ألطف بكثير على الجلد، ما عندو مرحلة التنشيط الفائق Retinization المشهورة، فمن ثم ما عندو الاحمرار والتقشير والحرقان البنشوفها مع كثير من الريتينويدات، وكثير من المرضى البفشلوا في تحمل التريتينوين أو الأدابالين بقدروا يستمروا مع الكلاسكوترون بسهولة أكبر
ثانياً هو أول مضاد أندروجين موضعي حقيقي آمن للذكور والإناث معاً، ودي نقطة مهمة جداً، الزول البسمع كلمة "مضاد أندروجين" ممكن يفتكر إنو الدوا حيأثر على هرمونات الجسم كلها، لكن الحقيقة إن المادة دي بعد ما تدخل الجلد بتتحول بسرعة لمركب غير نشط، وما بتعمل التأثيرات الجهازية البنشوفها مع بعض الأدوية الفموية
عشان كده بقى خيار ممتاز للمراهقين الذكور والاناث البعانوا من نوبات حب شباب مرتبطة بالهرمونات، والناس البشرتهم ما بتستحمل الريتينويدات، وبرضو ما لازم ننظر ليهو كمنافس للريتينويدات، في الواقع أجمل استخدام ليهو غالباً بكون معاها، لأن كل واحد فيهم بشتغل في مسار مختلف تماماً، الريتينويد بفتح البصيلة ويمنع الانسداد، والكلاسكوترون بقلل التحفيز الهرموني للغدة الدهنية، ودي واحدة من أكثر التركيبات المنطقية في العلاج الحديث
السلبية الحقيقية الوحيدة حالياً هي السعر والتوفر، الدوا ما متاح بصورة منتظمة في السودان، وغالباً بجي عن طريق الاستيراد، وسعره أعلى بكثير من العلاجات التقليدية، لكن بالنسبة لبعض المرضى، خصوصاً أصحاب البشرة الحساسة أو حب الشباب الهرموني، بقى واحد من أكثر الخيارات إثارة للاهتمام في السنوات الأخيرة
وفي علاج موضعي تالت نادر ما الناس سمعت عنو، لكنو ممتاز للنساء البالغات، ودي قصة الـ Dapsone، الحصان الأسود في علاج حب الشباب الحديث، اللي حيكون موضوع المنشور الجاي
#حكاية_حب_الشباب #عيادات_بيت_العافية #عيادة_الجلدية_أون_لاين