بنت عندها حبوب خفيفة في الجبهة، قررت تحاربها بجدية، غسلت وشها أربع مرات في اليوم بصابون قوي، مسحت بماء ورد وليمون، ختت سيروم زيتي "طبيعي"، وفوقو كريم تفتيح، وبالليل عملت دعك خشن عشان "تفتح المسام"، بعد شهر، الحبوب بقت أكتر، والبقع الداكنة أغمق، والجلد بقى يلسع من أي حاجة
الغلطة هنا هي أن الحرص اتنفذ بعنف، البشرة المعرضة لحب الشباب عندها بصيلات قابلة للانسداد، وجهاز مناعي سريع الاشتعال، لمن نغسلها زيادة أو نعاملها كأنها سطح وسخان محتاج كشط، بننتهي من حاجز البشرة البحمينا، فيزيد الجفاف والتهيج، وتبدأ الغدد الدهنية تعوّض بزهم أكتر، وتلقى البصيلة فرصة جديدة للكتمة والالتهاب
الغسيل المطلوب بسيط: مرة أو مرتين في اليوم بغسول لطيف، وبخفة، الإحساس الصحيح بعد الغسيل إن الجلد ما يكون مشدود كأنو اتغسل بصابون غسيل، بل يكون نضيف ومرتاح، الشدّة واللسعة والجفاف الشديد علامات إن الحاجز اتأذى، والحاجز المتأذي في البشرة السمراء بفتح باب التصبغ بعد الالتهاب أسرع
في مكونات معينة ممكن تسد المسام عند الناس القابلين لحب الشباب، ودي بنسميها مكونات كوميدوجينية (comedogenic)، زيت جوز الهند على الوش مثال مشهور، وبرضو في مكونات زي آيزوبروبيل ميرستات (isopropyl myristate) وبعض مشتقات اللانولين (lanolin derivatives)، فمن ثم قراءة المكونات وتجنب المهيجات دي أو الحرص على شراء المنتجات المكتوب عليها (غير مسببه للكوميدونات non comedogenic) هي الخطوة السليمة
الزيوت الثقيلة والخلطات التقليدية برضو بتدخل في نفس الباب، سيروم بزيت اللوز، خلطة دهنية قبل النوم، كريم شعر بسيح على الجبهة، أو طبقات كثيرة من المرطب والواقي والمكياج والعلاج، كلها ممكن تعمل كتمة، والمكياج الثقيل لو ما اتشال كويس قبل النوم، بفضل مع العرق والزهم والتراب، والبصيلة تدفع التمن
الدعك الخشن والسنفرة اليومية بزيدوا القصة سوءا، الحبة الملتهبة ما محتاجة احتكاك، محتاجة تهدئة وعلاج، كل ضربة خشنة ممكن تحول بثرة صغيرة لبقعة داكنة قاعدة شهور
القاعدة العملية: نظّف بخفة، رطّب بمرطب خفيف غير ساد للمسام، استخدم واقي شمس مائي، وامسح العلاج الموصوف فقط بدل طبقات عشوائية، الجلد البنتعامل معاهو بهدوء بدي فرصة للعلاج يشتغل، والجلد البنتعامل معاهو بعنف بردّ علينا بالتهاب
والآن نجي للقسم الأهم حول العلاج في عدة منشورات من صباح الغد
#حكاية_حب_الشباب #عيادات_بيت_العافية #عيادة_الجلدية_أون_لاين