في نوع من حب الشباب بجي كأنو عندو تقويم شهري خاص، الحبوب ما بتطلع عشوائيا في كل الوش، بتتجمع حول الذقن، وخط الفك، وأسفل الوش، وتزيد قبال الدورة بأيام، ثم تهدأ شوية، وترجع تاني الشهر البعدو، هنا العقل بمشي طوالي للهرمونات، وغالبا معاهو حق
الغدد الدهنية حساسة جدا لإشارات اسمها الأندروجينات (androgens)، ودي هرمونات موجودة عند الرجال والنساء بدرجات مختلفة، منها التستوستيرون (testosterone) وديهايدروتستوستيرون (DHT)،يلا داخل الغدة الدهنية في إنزيم اسمو خمسة ألفا ريدوكتيز (5α-reductase)، وخصوصا النوع الأول (type 1)، بقدر يحول التستوستيرون لصورة أقوى اسمها (DHT)، الصورة الأقوى دي بتمسك في مستقبلات خاصة على الخلايا الدهنية، أو السيبوسايتس (sebocytes)، وتقول ليها: زيدي الإنتاج
عشان كده حب الشباب الهرموني ما شرط يكون معناه إن الهرمونات عالية جدا في الدم، أحيانا التحاليل بتطلع عادية، لكن الغدة الدهنية نفسها حساسة زيادة، كأنها بتسمع الهمس كأنو صوت مايكروفون، فكمية بسيطة من الإشارة الهرمونية ممكن تعمل زهم أكتر، وانسداد أكتر، والتهاب أكتر في زول عندو قابلية
النمط البنشوفو عند نساء كتار بعد العشرينات والتلاتينات غالبا بكون في أسفل الوش، والذقن، وحواف الفك، مع تفجر قبال الدورة، وده ما نفس النمط الكوميدوني الخفيف البنشوفو في بداية المراهقة، هنا الحبوب ممكن تكون أعمق، أكثر ألما، وأبطأ في الاختفاء، وأثرها الداكن بقعد أطول، خصوصا في بشرتنا السمراء
هنا لازم ننتبه لـ متلازمة المبيض متعدد الكيسات (PCOS) أو بإسمها الجديد Polyendocrine Metabolic Ovarian Syndrome (PMOS) ، لأنها سبب شائع ومهم، فلو حب الشباب جاي مع عدم انتظام الدورة، وشعر زائد في الذقن أو الصدر، وزيادة وزن، أو تساقط شعر بنمط واضح، فالموضوع بحتاج تفتيش أعمق، ما مجرد كريم وغسول، الطبيب ممكن يطلب فحوصات هرمونية، خصوصا لو حب الشباب بدأ فجأة بعد العشرينات، أو بقى شديد بسرعة، أو ظهر مع علامات أندروجينات زائدة
الفكرة المهمة إنو الهرمونات ما عذر غامض نقول بعدو "ما في حل"، بالعكس، فهم النمط الهرموني بيفتح باب علاجات مختلفة، لأننا هنا ما بنطارد الحبة الظاهرة بس، وإنما بنحاول نفهم الإشارة البتخلي الغدة الدهنية تشتغل زيادة كل شهر
والآن بعد ما فهمنا الفسيولوجيا، لازم نشوف كيف بظهر المرض بأشكال مختلفة، عشان كل شكل ليهو علاج مختلف، فحنتكلم المرة الجاية عن مرحلة الوجوه السريرية، وتصنيف حب الشباب
#حكاية_حب_الشباب #عيادات_بيت_العافية #عيادة_الجلدية_أون_لاين