البثرة بتتغذى من إشارات جاية من جوا الجسم أكتر مما بتتغذى من الزيت البتدهنو فوق وشك، ودي من الحاجات الخلت فهم حب الشباب يتغير: الأكل ما بعمل حبة بطريقة مباشرة وساذجة، كأنو لقمة بطاطس مشت طلعت في الخد، الموضوع أذكى من كده، وأعمق،
في جسمنا في إشارات بتقول للخلايا: انقسمي، اصنعي دهون، كبّري النشاط، وخلي المصنع شغال، من أهم الإشارات دي العامل النموي شبيه الإنسولين رقم واحد (IGF-1)، وده برتفع مع البلوغ، وبتأثر ببعض أنماط الأكل، خاصة الأكل عالي المؤشر السكري high glycemic index food، وبعض منتجات الألبان، وبرضو لقوا أن مكمل البروتين الاسمو (الويي Whey Protein) بلعب نفس الدور، فلمن الإشارة دي تزيد في زول عندو قابلية لحب الشباب، الغدة الدهنية بتفهم الرسالة كأنها أمر تشغيل زائد،
القصة الجوا الخلية ماشّة عبر مسار اسمو (PI3K / Akt)، وده في النهاية بزيح بروتين مهم اسمو (FoxO1) من النواة، للتوضيح أكتر، تخيل النواة دي غرفة الإدارة، و(FoxO1) واحد من الناس البكبحوا الاندفاع وبيقولوا للمصنع: أهدأ شوية، فلمن يطلع من غرفة الإدارة ويقيف صوتو، الكبح بضعف، فإشارات الأندروجينات وإنتاج الدهون وتكاثر الخلايا بتلقى مساحة أكبر للحركة
بعد داك بظهر لاعب تاني مهم اسمو (mTORC1)، وده ممكن نعتبره مدير النمو والتصنيع داخل الخلية، لمن ينشط زيادة، بيدفع الغدة الدهنية تصنع دهون أكتر، ويدفع خلايا البصيلة تتكاثر وتتماسك أكتر، فبنرجع لنفس الدائرة الاتكلمنا عنها: زهم متغير، انسداد، خلل ميكروبيوم، والتهاب
عشان كده بنقول إن حب الشباب عندو جانب أيضي، يعني مرتبط بطريقة قراءة الجسم للطاقة والنمو، ما مجرد وش دهني، ودي برضو الحتة البتفسر ليه اللبن الخالي من الدسم ما دايما خيار لطيف للبشرة القابلة لحب الشباب، رغم إنو في الثقافة العامة بنعتبره "أصح"، بعض الدراسات بتربط الحليب الخالي من الدسم وبروتين الويي بزيادة حب الشباب، غالبا بسبب تأثيرها على الإنسولين و(IGF-1) و(mTORC1)، بينما الأدلة في الزبادي والجبنة أضعف وأقل ثباتا
المقصود هنا ما إننا نخوف الناس من الأكل، ولا نخت قائمة ممنوعات طويلة، المقصود نفهم إنو البثرة أحيانا بتكون آخر ترجمة لرسائل داخلية عن النمو والطاقة، خصوصا في الجسم القابل للالتهاب والانسداد، وحنتكلم عن أنواع الأكل بالتفصيل وأدلتها ببوست لاحق
لكن الأكل ما بشتغل براهو، وراهو هرمونات وجينات وحساسية فردية بتخلي نفس الكباية تعمل أثر في زول، وما تعمل شيء في زول تاني، فالمنشور الجاي حيكون عن علاقة حب الشباب بالدورة الشهرية
#حكاية_حب_الشباب #عيادات_بيت_العافية #عيادة_الجلدية_أون_لاين