النزف الشظوي والتهاب الشغاف

في خطوط صغيرة تحت الظفر شكلها زي شظايا خشب رفيعة، لونها أحمر غامق أو بني، ماشية بالطول مع اتجاه نمو الظفر، وكتير من الناس بتشوفها وتقول: "يمكن اتخبطت وما متذكر"، وفي أغلب المرات الكلام دا بكون صاح، لأن أكثر سبب للنزف الشظوي (Splinter Hemorrhage) هو الضربات الصغيرة المتكررة، قضم الأظافر، ضغط الحذاء، الشغل اليدوي، أو تركيب الأظافر الصناعية

النزف دا بجي من شعيرات دموية دقيقة في سرير الظفر، ولأن الشعيرات دي مرتبة بالطول، الدم بظهر كخط طولي رفيع، ما كنقطة ولا كبقعة كبيرة، ولو السبب ضربة، غالبا بنلقاه في ظفر واحد أو اتنين، قريب من الطرف، ومع نمو الظفر بمشي لقدام لحدي ما يطلع ويتقص، وما بكون معاه حمى ولا تعب ولا علامات في الجسم

لكن نفس الخط الصغير دا ممكن أحياناً يكون رسالة من جوا الجسم، خصوصاً لو ظهر في عدة أظافر، ,قريب من قاعدة الظفر، وبدون أي ضربة واضحة، هنا بنبدأ نفتش عن أسباب جهازية زي الصدفية، بعض أمراض المناعة والأوعية، وبعض الأدوية، ومن أخطرها التهاب الشغاف (Infective Endocarditis)، وهو التهاب بكتيري في البطانة الداخلية للقلب أو على صماماتو

التهاب الشغاف ما بنتشخص من الظفر براهو، لكن الظفر ممكن يكون واحد من الخيوط البتجمع الصورة، خصوصاً لو مع النزف الشظوي في حمى مستمرة، عرق بالليل، تعب شديد، نقص وزن، ضيق نفس، ألم مفاصل، أو تاريخ صمام قلب صناعي، مرض صمامات قديم، أو إجراء أسنان قريب بدون تغطية مناسبة في زول عالي الخطورة

في الفحص السريري بنفتش برضو عن علامتين كلاسيكيات: آفات جانواي (Janeway Lesions)، بقع حمراء أو بنفسجية صغيرة في راحة اليد أو باطن القدم وغالبا ما مؤلمة، وعقد أوسلر (Osler Nodes)، حبوب صغيرة مؤلمة في أطراف الأصابع أو الأصابع ذاتها، وجود العلامات دي مع الحمى والنزف الشظوي ما معناه نعمل تشخيص من الصورة، لكنه معناه إنو لازم نرفع الحذر ونفحص القلب والدم بسرعة

في البوست الجاي حنتكلم عن مرض جلدي ممكن يسرق الظفر نهائياً لو اتأخرنا: الحزاز المسطح للظفر، إنذار الحريق البحتاج تدخل بدري

الحلقة القادمة: الحزاز المسطح للظفر

#حكاية_الظفر #عيادات_بيت_العافية #عيادة_الجلدية_أونلاين