في ثآليل بتتعبنا، وثآليل بتخدعنا، زول عندو حتة خشنة جنب الظفر أو تحتو، اتعاملت كشامة جلدية أو ثؤلول عادي، اتحرقت مرة واتنين، اتقصت، اتمسحت ليها أدوية، ورجعت تاني، ومع الزمن الظفر بقى يتفرتق، ينفصل، يطلع صديد بسيط، أو ينزف بأقل لمسة، هنا لازم العقل ما يفضل ماشي في سكة “ثؤلول عنيد” للأبد، لأنو في تشخيص نادر لكن مهم اسمو سرطان الخلايا الحرشفية تحت الظفر (Subungual Squamous Cell Carcinoma)
المشكلة في الورم دا إنو بطيء وماكر، بمر سنوات أحياناً متخفي في لبس حاجات مألوفة جداً: فطريات، ظفر ناشب، التهاب مزمن حول الظفر، أو ثؤلول فيروسي، عشان كدا كثير من المرضى بلفوا بين كريمات ومضادات فطريات وكيّ بالتبريد، بينما الآفة نفسها قاعدة تكبر تحت الظفر، في السرير أو المصفوفة، وتغيّر شكل الظفر حتة حتة
العلامات البتخلينا نرفع الحذر ما محتاجة تعقيد: مشكلة في ظفر واحد بس، مستمرة شهور طويلة، ما استجابت لعلاج فطريات أو علاج ثؤلول، ومعاها كتلة خشنة أو متقرنة، نزيف متكرر، ألم جديد، انفصال في الظفر، صديد بسيط راجع، أو تآكل في الصفيحة، أي واحدة من دي، خصوصاً في بالغ، بتستحق فحص جلدية جاد، وما مفروض تتساب تحت اسم “عين سمكة” أو “فطر ناشف”
في علاقة معروفة بين بعض حالات الورم دا وفيروس الورم الحليمي البشري (HPV)، خصوصاً الأنواع عالية الخطورة، وبرضو بظهر أكثر مع ضعف المناعة، التعرض القديم للأشعة أو الكيماويات، الرضوض المتكررة، وأحياناً بدون سبب واضح، ولو ظهرت آفات شبيهة بالثآليل في عدة أظافر أو تكررت بطريقة غريبة، خصوصاً مع ضعف مناعة معروف، فدي ما ونسة علاج منزلي، دي حوجة لتقييم طبي أوسع
التشخيص ما بكون بالتخمين، منظار الجلد (Dermoscopy) ممكن يساعد، والأشعة أو الرنين قد تدخل لو في شك في العظم، لكن الكلمة الفاصلة غالباً بتجي من العينة (Biopsy)، والعينة هنا ما معناها إنو الطبيب متشائم، معناها إننا وقفنا الدوامة الطويلة بين “فطر” و“ثؤلول” وقررنا نسأل النسيج ذاتو
والخبر المهم إنو التشخيص المبكر بفرق كثير، زمان كان الخوف الأكبر إن أي ورم تحت الظفر يعني بتر الإصبع، لكن اليوم في حالات كثيرة العلاج المبكر والجراحة المحافظة أو جراحة موهس (Mohs Surgery) ممكن تشيل الورم وتحافظ على أكبر قدر من الإصبع والوظيفة، أما التأخير لحدي ما يدخل العظم فهو البصعّب القصة
في البوست الجاي حنمشي لعلامة صغيرة شكلها كأنها شوكة دم تحت الظفر، ونتعلم متين تكون ضربة عادية، ومتين تخلينا نفتش عن التهاب الشغاف داخل القلب
الحلقة القادمة: النزف الشظوي والتهاب الشغاف
#حكاية_الظفر #عيادات_بيت_العافية #عيادة_الجلدية_أونلاين