الخط الأسود تحت الظفر من العلامات البتخلع الناس، وبتخلعنا نحن كأطباء برضو، لأنو في أغلب الحالات ممكن يكون تصبغ حميد، خصوصاً في البشرة السمراء، وممكن يكون بعد ضربة أو التهاب أو دواء، لكن في نسبة قليلة ومهمة، الخط دا ممكن يكون بداية ميلانوما تحت الظفر (Subungual Melanoma)، ودي من أخطر أورام وحدة الظفر لأنها كتير بتتأخر في التشخيص، والناس بتتعامل معاها شهور كأنها فطريات أو كدمة قديمة
الميلانوما دي بتبدأ غالباً من المصفوفة، المصنع المتدسي تحت الجلدة الحامية، عشان كدا بتطلع كخط بني أو أسود ماشي بالطول من قاعدة الظفر لقدام، المشكلة ما في وجود اللون براهو، المشكلة في سلوك اللون، هل الخط بقى أعرض مع الزمن؟ هل لونو ما متساوي، حتة بني فاتح وحتة أسود غامق؟ هل حوافو بقت مشوشة؟ هل ظهر في ظفر واحد بس، خصوصاً الإبهام أو إصبع الرجل الكبير؟ هل بدأ بعد سن البلوغ وما عندو تفسير واضح؟
عشان كدا الأطباء بستخدموا قاعدة اسمها ABCDEF، ودي ما للحفظ البارد، دي عشان تخلي العين تعرف متين تقلق، حرف A بذكرنا بالعمر واللون، لأن الميلانوما تحت الظفر بتزيد أهميتها في العقد الخامس للسابع، خصوصاً مع البشرة الداكنة، وحرف B للخط البني أو الأسود الواسع أو المتغير، خصوصاً لو عرضه زاد أو بقى أكثر من تلاتة مليمتر تقريباً، وحرف C للتغير المستمر، يعني الخط ما ثابت وشكله بتغير بسرعه أو بنزف وبتشوه، وحرف D للإصبع الواحد، غالباً الإبهام أو إصبع الرجل الكبير، وحرف E لامتداد اللون على الجلد حول الظفر، ودي علامة هتشينسون (Hutchinson sign)، أما حرف F فبذكرنا بالتاريخ العائلي أو الشخصي للميلانوما
علامة هتشينسون مهمة شديد: لما السواد ما يقيف داخل الظفر، بل يطلع على الجلدة الحامية أو الجلد الجانبي حول الظفر، كأنو حبر فاض من الظفر للجلد ، هنا لازم الفحص يكون سريع، لأن التصبغ ما بقى محصور داخل الصفيحة، ودي علامة كلاسيكية بتقوي الشك في الميلانوما، خصوصاً لو معاها تشقق في الظفر، أو نزيف، أو ألم جديد، أو كتلة تحت الظفر، أو انفصال للظفر ما راضي يتحسن
في ناس عندهم خطوط بنية متعددة في أكثر من ظفر، ودي ممكن تكون تصبغات حميدة مرتبطة بالبشرة السمراء أو الوراثة أو بعض الأدوية، وهنا بنطمئن أكثر لو الخطوط متشابهة، رفيعة، ثابتة، وفي عدة أظافر، لكن خط جديد في ظفر واحد عند زول بالغ، خصوصاً لو عريض أو بتوسع أو داخل على الجلد حول الظفر، فده علامة خطر لازم الانتباه الجاد ليها
الفحص الأمثل بكون عند طبيب جلدية بمنظار الجلد (Dermoscopy)، وأحياناً لو الشك عالي بنحتاج عينة من المصفوفة أو سرير الظفر، لأنها الفرق بين تشخيص مبكر ممكن يحافظ على الإصبع، وتشخيص متأخر بفتح أبواب علاج أصعب بكثير
في البوست الجاي حنتكلم عن ورم أقل شهرة لكنه خطير في خداعه: سرطان الخلايا الحرشفية تحت الظفر، الثؤلول العنيد البقعد سنين وما بطلع ثؤلول
الحلقة القادمة: السرطان الحرشفي تحت الظفر
#حكاية_الظفر #عيادات_بيت_العافية #عيادة_الجلدية_أونلاين