التهاب حول الظفر الحاد (Acute Paronychia)، غالبا بحصل بعد جرح صغير جدا المريض ما بتذكره، زي قص الجلد الزائد حول الظفر، أو عض الأظافر، أو تنظيف تحت الظفر بدبوس، أو إصابة بسيطة أثناء الشغل، الجرح الصغير دا بفتح الباب للبكتيريا إنها تدخل تحت الجلد الجانبي أو الخلفي حول الظفر، فخلال يومين لي خمسة أيام الجلد بحمر وينتفخ ويبقى حار ومؤلم، وأحيانا يتجمع صديد واضح زي نقطة صفراء أو بيضاء تحت الجلد، والوجع بكون نابض ومركز، خصوصا لما المريض يلمس حافة الظفر
القاعدة العملية هنا إنو الالتهاب الحاد لو كان مجرد احمرار وألم بدون صديد واضح، ممكن يتحسن بنقع الإصبع في موية دافئة عدة مرات في اليوم، مع كريم مضاد حيوي موضعي حسب تقييم الطبيب، وتجنب أي عبث إضافي بالجلد، لكن لو الصديد اتجمع، فالمضاد الحيوي براهو غالبا ما حيكفي، لأنو الصديد في جيب مغلق محتاج تفريغ طبي بسيط تحت التعقيم، أحيانا بفتحة صغيرة جدا جنب الظفر، وبعدها الألم بنقص بسرعة، أما فتحه في البيت بإبرة أو موس فحيعمل مشكلة أكبر، لأنه ممكن يدخل بكتيريا أعمق، أو يجرح المصفوفة، أو يحول التهاب بسيط لتشوه دائم في الظفر
لكن قبل ما أي زول يفتح أو يعصر أو يفرغ، في تشخيص خطير لازم يتفصل من البداية، اسمو داحس الهربس أو Herpetic Whitlow، ودي عدوى فيروس الهربس في الإصبع، شكلها ممكن يخدع الناس لأنها بتظهر حول الظفر برضو، وفيها ألم واحمرار وانتفاخ برضو، لكن الفرق المهم إنو الألم غالبا بكون حارق أو واخز وقوي بشكل ما متناسب مع الالتهاب، وبتظهر فقاعات صغيرة شفافة متجمعة، مرات شكلها زي حبوب مائية دقيقة، وبعدها ممكن تتعكر وتظهر كأنها صديد، لكنها في الحقيقة فقاعات فيروسية، وفتحها بالمشرط أو الإبرة خطأ كبير، لأنه ما بطلع صديد حقيقي، وبيزيد انتشار الفيروس وبيطول مدة الشفاء، وقد يسبب عدوى ثانوية
عشان كدا أي التهاب حول الظفر فيه فقاعات مائية متجمعة، أو ألم حارق شديد، أو تاريخ قرحة برد في الفم، أو شغل في مجال طبي مع احتمال التعرض لإفرازات الفم، أو طفل بيمص إصبعو ومعاه تقرحات في الفم، لازم نفكر في الهربس قبل ما نسميه صديد، العلاج هنا مختلف تماما، بحماية للمنطقة، ومسكنات، وتقييم مبكر لاحتمال تناول مضاد فيروسي زي الأسيكلوفير في الحالات المناسبة، خصوصا لو اتشخصت بدري
نتكلم الحلقة الجاية عن التهاب حول الظفر المزمن
حكاية_الظفر #عيادات_بيت_العافية #عيادة_الجلدية_أونلاين