من بين كل الفيتامينات اللي اتكلمنا عنها، فيتامين د بمثل حالة متفردة جداً، لأنو علمياً أقرب لكونه هرمون متكامل من كونه مجرد فيتامين، والجلد حقنا ما بس بستقبله من الأكل والمكملات، بل هو المصنع الأساسي والرئيسي اللي بنتجه جوة أجسامنا بمجرد ما نتعرض لأشعة الشمس المباشرة.
ولما يقل التعرض للشمس أو يضعف الامتصاص، الجسم كله ببدأ يشتكي بصمت وبدي إشارات عامة مرات الناس بتتجاهلها، زي الإرهاق المزمن والفتور العجيب من أقل مجهود، والألم المبهم في العظام والمفاصل والعضلات، وحتى المود والمزاج بكون متقلب وأقرب للاكتئاب وفقدان الشغف من غير سبب واضح.
التأثير العميق ده في السستم الداخلي بمتد طوالي وبشكل مباشر لشكلنا الخارجي ولصحة جلدنا وشعرنا، لأنو فيتامين د بيلعب دور محوري وأساسي في تنظيم دورة حياة بصيلة الشعر، ولما ينقص، البصيلة بتعجز تماماً إنها تدخل في مرحلة النمو الجديدة، والنتيجة بتكون تساقط شعر مستمر ومحبط جداً ما بستجيب لأي بخاخات أو زيوت خارجية مهما كانت غالية.
غير كدة، الفيتامين ده بيعتبر المايسترو اللي بهدي وبنظم عمل جهاز المناعة جوة الجلد، ونقصه بيخلي المناعة تفقد توازنها وتبقى عدائية، وده بيفسر لينا طبياً ليه مرضى الإكزيما أو الحساسية التأتبية اللي عندهم نقص في فيتامين د بتكون هجمات الحساسية والهرش عندهم أعنف وأشرس، والجفاف في جلدهم بكون قاسي جداً ومتمرد على العلاج مقارنة بالمرضى اللي مستويات الفيتامين عندهم طبيعية.
وهنا لازم نقيف عند واحدة من أشهر الخرافات والمخاوف اللي بنشوفها يومياً في العيادات، لما تدخل أم منزعجه جداً من بقع بيضاء خفيفة عليها قشور بسيطة عند طفلها طفلها، في وشه أو أطرافه ، وتكون مقتنعة تماماً إنو ده أكيد نقص حاد في فيتامين د أو نقص كالسيوم، أو حتى ديدان في البطن زي ما متداول بين الناس.
الحقيقة الطبية هي إنو البقع دي حالة بنسميها طبياً النخالة البيضاء (Pityriasis Alba)، وما عندها أي علاقة لا من قريب ولا من بعيد بنقص الفيتامينات أو الكالسيوم أو الديدان، بل هي ببساطة شديدة عبارة عن نوع خفيف جداً من الإكزيما وجفاف الجلد، بيزيد ويوضح أكتر التعرض لشمس الظهيرة الحارة وما بتحتاج غير الترطيب المستمر مع الحماية الجيدة من أشعة الشمس المباشرة عشان تدي الخلايا فرصة ترمم نفسها ويرجع لون الجلد لطبيعته وتجانسه
#عيادات_بيت_العافية
#عيادة_الجلدية_عن_بعد
#جلدك_مراية_أكلك