فيتامين ب 12 البذوب في الماء، بيمثل حالة استثنائية جداً لأنو الكبد بيقدر يخزن منو كميات بتكفي الجسم لسنوات طويلة، وعشان كدة، نقص ب١٢ ما بحصل بين يوم وليلة
غالباً بحصل عند الناس المعتمدين على نظام نباتي صارم لفترة طويلة لأنو مصادرو الطبيعية حيوانية بحتة، أو عند الناس اللي عندهم مشاكل مزمنة في حموضة وامتصاص المعدة والبياخدوا أدوية زي مضادات الحموضة والميتوفورمين (السكري ومقاومة الانسولين وبعض حالات تكيس المبايض).
لما المخزون الكبدي يبدأ ينتهي، الجلد بيكون من أوائل الأعضاء اللي بتدق ناقوس الخطر وبدينا علامات غريبة ومميزة جداً، أهمها إنو بيحصل خلل واضح في عملية تصنيع وتوزيع صبغة الميلانين في البشرة.
المريض ببدأ يلاحظ اسمرار وتصبغ غامق في أماكن محددة من غير ما يتعرض للشمس، زي مفاصل أصابع اليدين والرجلين اللي بتسود بشكل ملحوظ جداً، وخطوط كف اليد، وحتى جوا تجويف الفم وحوالين الشفايف بيظهر اسمرار وبقع داكنة.
الموضوع ما بقيف على التصبغات دي بس، بل بشمل التهاب اللسان اللي بيفقد حليماته ويبقى أحمر وأملس ومؤلم مع الأكل، بالإضافة لتساقط الشعر والشيب المبكر اللي بظهر فجأة كعلامة إنذار إضافية.
لكن المفارقة العجيبة اللي بتواجهنا دايماً في عيادات الجلدية ما بتجي من النقص، بل بتجي من الهوس المجتمعي الزايد بأخذ حقن ودربات فيتامين ب١٢ كـ "مقوي عام للأعصاب" و"منشط للطاقة" بدون أي فحص طبي يثبت وجود نقص حقيقي في الدم.
كتير من الناس الأصحاء بياخدوا الجرعات العالية دي كنوع من الروتين الدوائي بمجرد ما يحسوا بفتور، وفجأة يتفاجأوا بمشكلة جلدية غير متوقعة تماماً وهي طفح جلدي عنيف ومفاجئ بيشبه حب الشباب بنسميه طبياً الانفجار العدي أو (Acneiform Eruptions)
اللي بيحصل علمياً هو إنو الجرعات المهولة والمفاجئة من ب١٢ بتسري في الدم وتصل للجلد، وهناك بتعمل تغيير جذري في جينات البكتيريا المتعايشة بسلام جوة مسام الجلد، وبتخليها تفرز مواد التهابية قوية بتفجر حبوب صديدية في الوجه والظهر والكتفين لزول ما كان بيعاني من أي حب شباب قبال كده.
المريض هنا ببدأ يصرف قروش كتيرة على غسولات وكريمات حب الشباب وهو ما عارف إنو سبب المشكلة الأساسي هو الحقنة الحمراء اللي أخدها عشان ترفع طاقتو، وإنو علاج الطفح ده ببدأ ببساطة شديدة بوقف الفيتامين العشوائي ده عشان ترجع بكتيريا الجلد لطبيعتها المسالمة.
#عيادات_بيت_العافية
#عيادة_الجلدية_عن_بعد
#جلدك_مراية_أكلك