في البوست التاني من السلسلة دي، اتكلمنا عن "أسطول النقل" (كريات الدم الحمراء)، وعرفنا إنو لو حجم الخلية "صغير" (MCV نازل)، ده غالباً معناه نقص حديد أو ثلاسيميا. لكن مرات، المريض بيستلم الفحص، ويلقى نسبة الدم (الهيموجلوبين) ناقصة، لكن المرة دي حجم الخلية (MCV) "عالي شديد".. يعني الخلايا الحمراء طالعة من النخاع العظمي أحجامها "عملاقة"!
هنا المريض ممكن يعاين للورقة ويسأل نفسه: "طيب ما دام الخلية كبيرة، ما ده معناه إنها ممتازة وبتقدر تشيل أوكسجين أكتر؟"،لكن في بيولوجيا الدم، القاعدة دي مقلوبة تماماً: "الكبير هنا مترهل وهش".
عشان نفهم القصة دي، نرجع لتشبيه "المصنع" (النخاع العظمي). إذا كان "الحديد" هو الأسمنت والمواد الخام البنبني بيها الخلية الحمراء، فالفيتامينات (تحديداً فيتامين ب12 وحمض الفوليك) هم "المهندسين" المسؤولين عن قراءة الخريطة الجينية (DNA) وتقسيم الخلايا بصورة صحيحة.
لما المهندسين ديل يغيبوا (بسبب نقص الفيتامينات)، المصنع جوة العظم بيتخبط، بيبدأ يصنع الخلية، وتكبر وتكبر جوا المصنع، لكنها ما بتقدر "تنقسم" عشان تصل للحجم الطبيعي المثالي المدمج.
كده المصنع بيطلع لمجرى الدم خلايا عملاقة بنسميها (Megaloblasts)، لكنها للأسف مترهلة، هشة، وعمرها قصير جداً.
في ورقة الـ CBC، الصورة دي بتظهر لينا بوضوح تام: أول حاجة بنلقى الـ (MCV) عالي جداً (أكبر من 100)،ولأنو الخلايا دي هشة وبتتكسر بسرعة في الشارع (الأوعية الدموية)، بنلقى المريض عنده "أنيميا" واضحة، رغم إنو ممكن يكون مخزون الحديد عنده مليان!
الفخ هنا إنو المريض ده لو فضل يبلع في حبوب حديد لشهور، دمه ما حيرتفع مليمتر واحد، ببساطة لأنو المشكلة ما في الأسمنت، المشكلة في غياب المهندسين.
والأخطر من كده، إنو "المهندسين" ديل (ب12 والفوليك) ما شغالين بس في قسم الكريات الحمراء، ديل مهندسين لعموم المصنع! عشان كده، في الحالات الشديدة، بنلقى في التقرير إنو الكريات البيضاء والصفائح الدموية ذاتها بدأت تنقص، في لوحة بتدي انطباع أولي إنو المصنع ده في طريقه للإفلاس.
في العادة، نقص الفيتامينات دي بيكون مرتبط بسوء التغذية أو عدم أكل الخضروات واللحوم. لكن، في نوع غريب جداً من الأنيميا دي، بيظهر في الفحص بنفس الأرقام (MCV عالي وأنيميا)، وبيحصل حتى لو المريض بياكل كبدة ولحوم كل يوم!
المشكلة هنا ما بتكون في الأكل أبداً، المشكلة بتكون في "المعدة".. وده حيكون موضوعنا في البوست الجاي: "الخيانة من الداخل.. الأنيميا الخبيثة".
#عيادات_بيت_العافية
#عيادة_الجلدية_أون_لاين