في البوست الفات عرفنا إنو غياب "المهندسين" (فيتامين ب12 وحمض الفوليك) بيخلي النخاع العظمي يتخبط وينتج كريات حمراء "عملاقة" وهشة، بتظهر في ورقة الفحص في شكل (MCV) عالي جداً. وذكرنا إنو السبب الغالب للموضوع ده هو سوء التغذية.
لكن، مرات بيجينا مريض بياكل لحوم وكبدة كل يوم، وغذاؤه ممتاز، ورغم كده بيجيب لينا فحص CBC بيصرخ من نقص ب12: الهيموجلوبين واقع، والـ MCV ضارب في السما (مرات بيفوت الـ 110 أو 120)!
دي الحالة البنسميها طبياً "الأنيميا الخبيثة" (Pernicious Anemia). وليه اتسمت خبيثة؟ لأنها باختصار "خيانة من الداخل".
المشكلة هنا ما عندها أي علاقة بالأكل، المشكلة الحقيقية قاعدة في "المعدة"، في الحالة دي، جهاز المناعة بيتلخبط وبيوجه أسلحته ويهاجم خلايا معينة في جدار المعدة، الخلايا دي مهمتها تفرز مادة سحرية اسمها (العامل الداخلي)، والمادة دي عبارة عن "تأشيرة الدخول" أو الجواز اللي بيحتاجه فيتامين ب12 عشان يعبر من الأمعاء ويدخل الدم. من غير التأشيرة دي، الفيتامين بيمر في الأمعاء ويخرج من الجسم زي ما دخل، كأنك ما أكلته أصلاً.
طيب، في ورقة الـ CBC المشهد ده بيظهر كيف؟ جهاز الفحص ما بيعرف المعركة الحاصلة في المعدة، لكن بيعكس ليك بدقة الكارثة الحاصلة في المصنع (النخاع العظمي):
1. الـ MCV العالي جداً: الخلايا بتطلع كبيرة ومترهلة وعمرها قصير، فبتتكسر وتعمل ليك أنيميا واضحة.
2. البصمة تحت المايكروسكوب: لو أخصائي المعمل عاين لعينة الدم دي، بيلقى حاجة مميزة جداً بتأكد التشخيص؛ "عساكر المشاة" (النيوتروفيل) الأتكلمنا عنهم زمان، شكلهم بيتغير ونواتهم بتكون مقسمة لأجزاء كتيرة جداً (Hypersegmented Neutrophils)، ودي علامة كلاسيكية في التقرير بتفضح نقص ب12.
3. مؤشرات الانهيار: لأنو الفيتامين ده أساسي لكل المصنع وما مقصور على قسم الكريات الحمراء بس، لو الحالة اتأخرت وما اتعالجت، المريض ده ممكن أرقامه كلها تبدأ تنزل؛ الكريات البيضاء تنقص، والصفائح تنقص مع الدم (Pancytopenia).
علاج الحالة دي مستحيل يكون "حبوب"، لأن المعدة أصلاً رافضة تدي التأشيرة للفيتامين، الحل بيكون "حُقن" عشان نتجاوز المعدة وندخل الفيتامين للدم مباشرة، وساعتها المصنع برجع يشتغل بكفاءة، والأرقام دي كلها بتتصلح والـ MCV بيرجع لطبيعته.
لحدي هنا، نحن اتكلمنا عن "عدد" الخلايا و"حجمها". لكن في رقم دايماً قاعد في الفحص بيقيس لينا "الزحمة" جوة شوارع الدم. رقم مهم، لكنه مرات بيكون خادع جداً.. في البوست الجاي حنتكلم عن "فخ الهيماتوكريت" (Hematocrit). متين تكون نسبة دمك 16 لكنك في الحقيقة بتعاني من أنيميا ومحتاج علاج؟
#عيادات_بيت_العافية
#عيادة_الجلدية_أون_لاين