تخيل معاي دولة دخلت في حرب استنزاف قوية، الجيش النظامي المدرب (النيوتروفيل الناضجة) نزل الميدان وقاعد يحارب بكل قوته، لكن العدو (البكتيريا) أشرس وأسرع من المتوقع، وبدأ يوقع في العساكر ديل بسرعة.
هنا النخاع العظمي (المصنع ومعسكر التدريب) بيضطر ياخد قرار طوارئ قاسي جداً: "تخريج الدفعات قبل ما تخلص تدريبها".
بيبدأ المصنع يرسل للدم خلايا مناعية غير ناضجة، لسة عبارة عن "مجندين صغار" ما اكتمل نموهم ولا اتعلموا فنون القتال (الخلايا دي اسمها في الفحص Band cells أو Metamyelocytes). خروج الخلايا غير الناضجة دي بأعداد كبيرة لمجرى الدم هو الحالة البنسميها طبياً في التقرير بـ "الشِفت لليسار" (Left Shift).
(بالمناسبة، التسمية دي تاريخية؛ لأنو زمان أيام العدادات اليدوية في المعامل، الزراير المخصصة لعد الخلايا غير الناضجة دي كانت قاعدة في أقصى يسار لوحة العداد!).
طيب، كأطباء لما نقرأ التقرير ونلقى "الشفت لليسار" ده، بنقيمه كيف؟
الشفت ده فيه نوعين، واحد مبشر والتاني خطير:
• الشفت الإيجابي (Regenerative): هنا بنلقى عدد كريات الدم البيضاء الكلي "مرتفع"، وفي نفس الوقت في نسبة من الخلايا غير الناضجة. ده معناه إنو صح في حرب شرسة، لكن "المصنع شغال وكفاءته عالية"، والجيش متماسك وقادر يرسل تعزيزات مستمرة تغطي النقص.
• الشفت السلبي (Degenerative): وده الخطر الحقيقي واللي بيعتبر جرس إنذار لحالة تسمم الدم (Sepsis). هنا بنلقى العكس تماماً: عدد البيضاء الكلي "طبيعي أو حتى منخفض!"، لكن نسبة الخلايا غير الناضجة "عالية جداً". ده معناه للأسف إنو الجيش النظامي اتدمر تماماً واستنزف، والمصنع فلس وفقد السيطرة، وبقى بيرمي أي "شافع" أو مجند صغير في المعركة وهو مهزوم.
ولما أخصائي المعمل الماهر يعاين للخلايا دي تحت المايكروسكوب في الحالات الشرسة، بيلقى فيها علامات دمار بنسميها تغيرات سُمّية (Toxic changes)، كأنو العساكر ديل راجعين من المعركة هدومهم مقطعة ومبهدلين!
النيوتروفيل دي قوات تخصصها الأول والأخير هو مكافحة "البكتيريا"، لكن، ماذا لو كان العدو هو "فيروس"؟ البكتيريا كائن ممكن تهاجمه مباشرة، لكن الفيروس ده عامل زي الجاسوس، بيدخل جوة خلايا الجسم ذاتها ويتدسه!
لمحاربة الجواسيس، المشاة ما بينفعوا، هنا بنحتاج جهاز "المخابرات العامة".. الخلايا اللمفاوية (الليمفوسايت)، في البوست الجاي حنتعرف على قوات النخبة دي، وحنعرف الفخ الرياضي البسيط في أرقام الليمفوسايت اللي بيدخل مرضى كتير في رعب بدون أي مبرر.
#عيادات_بيت_العافية
#عيادة_الجلدية_أون_لاين