الليلة حندخل "الثكنات العسكرية" الحقيقية لجسمك، أول ما المريض يلقى رقم كريات الدم البيضاء (WBC) مرتفع في الفحص، طوالي بيفترض إنو عنده التهاب بكتيري، وممكن جداً يمشي الصيدلية من نفسه ويصرف مضاد حيوي. لكن هل كل ارتفاع في العساكر دي معناه إنو في حرب أو التهاب حقيقي؟
عشان نجاوب، لازم نمسك أكبر فرقة في جيش الدم، وهي خلايا الـ (Neutrophils) أو النيوتروفيل، ودي بتمثل "عساكر المشاة" وخط الدفاع الأول ضد البكتيريا.
العساكر ديل، وبحسب التنظيم الإلهي الدقيق، ما بيكونوا كلهم حايمين في الدم في نفس الوقت.
الجيش ده متقسم لـ 3 معسكرات:
1. الاحتياطي الاستراتيجي: وده قاعد جوة المصنع (النخاع العظمي).
2. القوات المتجولة: ودي اللي ماشة في شوارع الدم، ودي "فقط" اللي المكنة حقت المعمل بتقدر تسحبها وتحسبها في الفحص.
3. القوات المرابطة (Marginating pool): وديل عساكر لاصقين في جدران الأوعية الدموية من جوة، عاملين زي "الارتكازات"، جاهزين ينطوا في أي نسيج يحصل فيهو جرح أو التهاب، وديل المكنة ما بتقدر تحسبهم لأنهم ما ماشين مع تيار الدم.
طيب، وين الفخ؟ الفخ بيحصل في حالة بنسميها (Pseudoneutrophilia) أو "الارتفاع الكاذب". تخيل معاي طفل صغير مشى المعمل، وبكى وكورك وخاف شديد من الإبرة، أو مريض بالغ أخد حقنة كورتيزون، أو حتى زول بيمر بضغط نفسي وجسدي شديد، الخوف والتوتر ده بيفرز هرمون الأدرينالين والكورتيزول في الجسم.
الهرمونات دي بتعمل زي "الصافرة"، بتخلي العساكر المرابطين في الارتكازات (اللي هم نص الجيش تقريباً) يفكوا من جدران الأوعية الدموية وينزلوا طوالي في نص الشارع (مجرى الدم).
وكده عينة الدم البنسحبها بعد دقايق بتطلع للجهاز أرقام عالية جداً لكريات الدم البيضاء، والمريض يتخلع، والدكتور لو ما منتبه ممكن يكتب مضاد حيوي لارتفاع أصلاً ما سببه بكتيريا، بل سببه مجرد "زعل" أو توتر أو كورتيزون! بمجرد ما المريض يروق، العساكر ديل بيرجعوا يمسكوا في الحيطة تاني والأرقام بترجع طبيعية.
عشان كدة، قراءة الفحص عمرها ما كانت أرقام صماء، بل هي ربط دقيق بين الرقم، وحالة المريض الواقف قدامك، وتفاصيل صغيرة زي دي.
لكن السؤال المهم: ماذا لو المعركة كانت حقيقية؟ بكتيريا شرسة دخلت الجسم، واستنزفت كل القوات المتجولة والمرابطة؟ النخاع العظمي حيتصرف كيف؟ هنا بيظهر لينا في الفحص مصطلح عسكري وخطير جداً اسمه "الشِفت لليسار" (Left Shift).. وده حيكون موضوعنا في البوست الجاي.
#عيادة_الجلدية_أون_لاين
#عيادات_بيت_العافية