تفكيك علاقة المرض بالقابلية الوراثية — فك الاشتباك بين الخلقي والوراثي والجيني

عشان نقدر نفهم موضوع الجينات والأمراض ده صاح لازم أول حاجة نفك الاشتباك الحاصل في مفاهيمنا ومصطلحاتنا لانو كتير مننا بيخلط بين كلمات زي خلقي ووراثي وجيني وبيستعملها كلها بمعنى واحد مع انو الفرق بينها كبير ومهم شديد وبيترتب عليهو فهمنا لطبيعة المرض ومصدره

أول مصطلح دايرين نوضحه هو كلمة (خلقي Congenital) فالكلمة دي بتوصف الزمن بس وما بتوصف السبب، يعني أي حاجة الطفل موجودة من لحظة الولادة بنسميها خلقية، سواء كان سببها مشكلة في الجينات أو كان سببها حاجة تانية خالص زي تعرض الأم لمرض معين (مثلا داء القطط Toxoplasmosis) أو دواء معين (مثلا الركيوتان Isotretinoin) أثناء الحمل بحيث يكون أثر على تكوين الجنين، يعني ما كل عيب خلقي معناها وراثة، ولازم الناس تنتبه للنقطة دي عشان ما نظلم ونلوم في الفاضي

نجي بعد داك للفرق الدقيق بين الوراثي والجيني المرض الوراثي هو المرض اللي بينتقل فعلياً من الأب أو الأم للأولاد عبر الجينات يعني في تسلسل عائلي واضح وانتقال للصفة من جيل لجيل أما كلمة جيني فمعناها أوسع شوية وهي بتعني انو في خلل في شريط الوراثة أو الكود بتاعنا، لكن الخلل ده ما بالضرورة يكون الزول ورثه من أبوه وأمه، بل ممكن يكون حصل براهو كدة! وده اللي حنشرحه بتفصيل أكتر في البوست الجاي

وبرضو لازم نعرف انو في أمراض جينية كتيرة ما بتظهر عند الولادة يعني ما خلقية لكنها موجودة في الجينات كقابلية Susceptibility وبتظهر بعد الزول يكبر بسنين طويلة، زي بعض أمراض الكلى والأعصاب

يعني باختصار يا جماعة ما كل خلقي وراثي وما كل جيني وراثي والتمييز ده مهم شديد عشان يخلينا نتعامل مع الأمراض دي بوعي وحكمة وما نحتار لما يظهر طفل عنده مشكلة صحية أو يظهر مرض بعمر كبير من غير يكون حصل قبل كده في الأسرة الممتدة، ونفهم انو الأسباب متنوعة ومعقدة أكتر مما نتخيل

#عيادات_بيت_العافية

#عيادة_الجلدية_أون_لاين