ما وراء مندل وفهمنا القديم

دايرين نخت يدنا على السبب الرئيسي اللي خلى فهمنا للوراثة يكون ضيق ومحصور لفترة طويلة وهو الوراثة المندلية اللي قريناها كلنا في المدارس وقصة البسلة والزهور ديك، فالفهم ده قايم على فكرة بسيطة ومحددة بتقول إنو لكل صفة جين واحد مسؤول منها ولو الجين ده خرب طوالي المرض بيظهر زي المفتاح البفتح ويقفل

الكلام ده فعلاً صاح لكن في حدود ضيقة شديد وبزبط بس مع أمراض نادرة وقليلة زي الأنيميا المنجلية Sickle cell anemia أو التليف الكيسي Cystic Fibrosis لكن المشكلة إننا عممنا الفهم البسيط ده على كل الأمراض وبقينا نفتش عن جين واحد للسكري وجين واحد للبهاق Vitiligo وجين واحد للاكزيما، بينما الواقع العلمي الليلة بيقول لينا كلام مختلف تماماً

في الحقيقة الأمراض الشائعة البنسمع بيها كل يوم وبتهمنا كلنا زي السكري والضغط والأمراض الجلدية والمناعية دي ما بتمشي بالمسطرة والقلم ولا بتخضع لقانون: واحد زائد واحد يساوي اتنين، لأنها أمراض معقدة ومافيها حتمية يعني مافي زول بيتولد ومكتوب في جينه إنو لازم يجيهو سكري مية بالمية لكن بيتولد وعنده قابلية أو استعداد بس

الفرق بين الحتمية والقابلية ده هو المفتاح اللي حيخلينا نفهم كيف جسمنا بيشتغل وكيف إنو الجينات بتمهد الطريق بس لكن ما بتمشيهو براها وده بياخدنا لمفهوم جديد وكبير حنشرحه المرة الجاية وهو كيف الجينات دي بتشتغل مع بعض كشبكة واحدة ما كجزر معزولة

#عيادات_بيت_العافية

#عيادة_الجلدية_أون_لاين