حديثنا هنا حيكون عن واحدة من أعمق وأهم النظريات الجديدة في علم الوراثة واللي بتشرح لينا ليه الأمراض الشائعة معقدة كدة، والنظرية دي اسمها نموذج الشبكة الشاملة أو Omnigenic Model
الفكرة ببساطة إننا لازم ننسى قصة انو الجين عامل زي زر الكهرباء، يا فاتح يا قافل، ونقوم نتخيل الجينوم ده كشبكة كهرباء ضخمة ومترابطة مع بعضها بشكل مدهش لدرجة انو أي حركة في طرف الشبكة ممكن تأثر مباشرة على الطرف التاني.
العلماء اكتشفوا انو في أمراض زي السكري والضغط ومشاكل المناعة الحكاية ما واقفة على جينات أساسية ومحددة بس لكن في آلاف الجينات التانية الصغيرة والبعيدة اللي بنسميها الجينات الطرفية أو Peripheral Genes ودي برغم انو تأثير الواحد فيها بسيط جداً ويكاد لا يذكر براهو لكن لما تتجمع الآلاف دي مع بعض بتعمل أثر تراكمي ضخم جداً
يعني الموضوع عامل زي النمل المتكاتف كل نملة بتشيل حبة رمل صغيرة لكن في النهاية بيبنوا بيت كبير وده اللي بيخلينا نقول إنو المرض هو محصلة لمجموع نقاط كتيرة جداً بتتجمع عشان تحدد قابليتك للإصابة
وعشان كدة مافي زول بيصحى من النوم فجأة بمرض بدون مقدمات جينية، لكن الحاصل بيكون انو رصيد النقاط الصغيرة دي عندو عالي، وده بيخلينا نفهم انو جسمنا ده شغال كمنظومة واحدة والخلل ما بيكون في حتة معزولة وإنما هو تموجات في الشبكة كلها ودي النقطة المفصلية اللي حتقودنا عشان نعرف دور البيئة ونمط الحياة في تفعيل أو تثبيط الشبكة دي في البوست الجاي
#عيادات_بيت_العافية
#عيادة_الجلدية_أون_لاين