تفكيك علاقة المرض بالقابلية الوراثية — البيئة هي التي تضغط الزناد

وصلنا للنقطة الحاسمة اللي بتدينا الأمل وتخلينا نمسك زمام الأمور في صحتنا، وهي دور البيئة ونمط الحياة في التحكم بجيناتنا، لانو زي ما قلنا سابقا فالجينات دي مجرد احتمالات أو زي ما بيشبهوها العلماء هي الهاردوير أو الجهاز لكن البيئة هي السوفتوير أوالبرمجة اللي بتشغل الجهاز ده

وعشان نفهم الحكاية دي كويس خلونا نحكي ليكم قصة غريبة ومشهورة جداً في الطب اسمها شتاء الجوع الهولندي ودي حصلت في نهاية الحرب العالمية الثانية سنة 1944 لما هولندا مرت بمجاعة قاسية شديد والناس ما كانت لاقية تاكل، العلماء لاحظوا انو الأطفال الكانوا أجنة في بطون أمهاتهم وقت المجاعة دي حصل ليهم تغيير دقيق في جيناتهم وتحديداً في جين مسؤول عن النمو

التغيير ده كان عبارة عن رسالة بيولوجية بتقول للجنين: الدنيا برة صعبة ومافي أكل ولازم جسمك يتعلم يخزن أي فتفوتة طاقة وما يصرفها، المشكلة ظهرت لما الأطفال ديل كبروا والمجاعة انتهت والأكل بقى راقد ومتوفر، لكن أجسامهم كانت لسة شغالة بنظام الطوارئ القديم وبقوا يصابوا بالسمنة والسكري وأمراض القلب بنسب أعلى بكتير من غيرهم

القصة دي بتورينا بوضوح كيف إنو البيئة من أكل وتوتر وظروف معيشية بتقدر تكتب على الشريط الوراثي وتغير طريقة عمله، وده العلم البنسميهو علم ما فوق الجينات Epigenetics أو التخلق

الرسالة المهمة هنا إنو جيناتك ما قدر محتوم وما حكم نهائي لكنها بتستجيب وتتغير حسب ظروفك وده بيعني إنو نمط حياتك الصحي ممكن يحميك من أمراض كتيرة حتى لو كنت شايل جيناتها في خلاياك وده المدخل اللي حنشوف بيهو كيف الحكاية دي ممكن تتطبق عمليا في العيادة مع أمراض زي السكري والبهاق في البوست الجاي

#عيادات_بيت_العافية

#عيادة_الجلدية_أون_لاين