خلونا نخش العيادة ونطبق الكلام النظري القلناهو بالمنشور الفات على أرض الواقع وتحديداً في الأمراض اللي بتشغل بالنا كلنا زي السكري والبهاق والاكزيما
كتير من المرضى بجونا مستغربين بسؤال: المرض ده جاني من وين؟ مع انو مافي زول من أهلي عندو! أو العكس يقولوا ليك أبوي عندو سكري هل أنا حيجيني برضو بالضرورة؟ وهنا لازم نفرق بين كلمتين مهمات شديد هم المرض العائلي والمرض الوراثي
المرض الوراثي زي ما قلنا قبل كدة هو اللي بينتقل مباشرة من الأهل (غالبا بجين واحد وواضح) لكن أغلب الأمراض الشائعة دي بنسميها عائلية Familial وده معناهو إنها بتكتر في عائلات معينة مش عشان في جين واحد بس بتوارثوهو، وإنما لأنو العائلة دي بتشترك في حاجتين مهمات:
- في الخلفية الجينية المعقدة: يعني آلاف الجينات الصغيرة اللي اتكلمنا عنها
- في البيئة ونمط الحياة: زي طريقة الأكل ونمط الحياة العام
عشان نبسط الفكرة خلونا نتخيل إنو أي مرض من ديل عبارة عن كباية وكل زول فينا عندو كباية خاصة بيهو الجينات بتملأ نص الكباية دي مثلاً ودي بنسميها القابلية أو الاستعداد وباقي الكباية بتملاها ظروف الحياة يعني التوتر والالتهابات ونوع الأكل والزعل إلخ، دي كلها قطرات بتزيد الموية في الكباية وفي لحظة معينة لما الموية تفوت الحد المسموح بيهو و تتدفق (ده اللي بنسميهو العتبة أو Threshold) طوالي المرض بيظهر!
يعني مثلاً في البهاق أو الأكزيما ممكن الزول يكون مولود وعندو استعداد جيني والكباية مليانة للنص لكن المرض ما يظهر إلا لما تحصل صدمة نفسية قوية أو مرض شديد يكب النقطة الأخيرة وتدفق الكباية وده بيجاوب لينا على سؤال ليه المرض بيظهر فجأة في عمر معين وليه ممكن اخوان في بيت واحد واحد يمرض والتاني لا مع انهم ماكلين من نفس الصحن، ده ببساطة لأنو العوامل البيئية والنفسية هي اللي بتحدد هل الكباية حتتدفق ولا حنقدر نحافظ على مستوى الأمان ودي الفكرة اللي حنختم بيها سلسلتنا في البوست الجاي ونشوف الخلاصة اللي بتريح البال
#عيادات_بيت_العافية
#عيادة_الجلدية_أون_لاين