في الآونة الأخيرة ظهر "ضيف جديد" ومهم جداً في روشتات دكاترة النساء والولادة والباطنية لعلاج الأنيميا اسمه الـ Lactoferrin، والاسم ده خادع شوية لأنو بيخلي الناس تفتكر طوالي إنو نوع من أنواع حبوب الحديد، وبيمشوا يشتروهو ويعتمدوا عليهو اعتماد كلي
لكن الحقيقة العلمية اللي لازم نعرفها عشان ما نضيع قروشنا وزمننا هي إنو اللاكتوفيرين ده ما "حديد"، هو ببساطة بروتين طبيعي بنستخرجو غالباً من حليب الأبقار، وشغلتو في الجسم ما إنو "يزيد" الحديد ككمية، إنما شغلتو إنو "يدير" و "ينظم" الحديد الموجود أصلاً. عشان نقرب الصورة، لو اعتبرنا الحديد هو "الركاب" اللي دايرين يدخلوا الدم، فاللاكتوفيرين ده هو "البص" أو "المُرحّل" اللي بيشيل الركاب ديل ويدخلهم بسلام
والأهم من كدة إنو عندو خاصية سحرية وهي إنو مضاد للالتهاب، يعني بيمشي "يتفاهم" مع الهبسيدين (البواب الصعب اللي اتكلمنا عنه زمان) وبيخليهو يفتح الطريق، فبيقلل الالتهابات اللي بتمنع الامتصاص، وعشان كدة هو بيعتبر خيار عبقري جداً للناس اللي عندهم "أنيميا الأمراض المزمنة" أو الأنيميا اللي بتجي مع الالتهابات، وللحوامل لأنو آمن جداً وما بيعمل الآثار الجانبية المزعجة بتاعت حبوب الحديد زي الإمساك والمغص.
لكن، وهنا مربط الفرس، اللاكتوفيرين ده "مدير حركة" شاطر جداً، لكنه ما بيقدر يشتغل لو "المخازن فاضية"، يعني لو إنت عندك نقص حديد حاد ومخزونك (الفرتين) في الأرض، وأكلك ضعيف وما فيهو حديد، وأخدت لاكتوفيرين براهو، حتكون زي اللي جاب "بص سياحي فخم" لكن ماف ركاب يركبوه، فما حتستفيد حاجة والهيموجلوبين ما حيرتفع بالسرعة المطلوبة
عشان كدة الاستخدام الذكي والفعال للاكتوفيرين إننا نستخدمه كـ "مُعزز" ومساعد مع حبوب الحديد العادية عشان يسرع الامتصاص ويحمي المعدة، أو نعتمد عليهو براهو في حالات خاصة جداً لما يكون الحديد متوفر في الأكل بس الجسم عاجز يمتصه بسبب الالتهاب، فما تتغشوا في الاسم، واعرفوا إنو هو "المفتاح" وليس "الكنز" نفسه.
#عيادات_بيت_العافية
#عيادة_الجلدية_أون_لاين