واحدة من أكتر الحاجات البتخلع الأمهات والآباء ظهور بقع فاتحة على وش الطفل، أول ما بشوفوها السؤال بكون: «ده بهاق؟»، وبعدها بتبدأ رحلة الكريمات والوصفات والتجارب، مع انو السبب في حالات كتيرة بكون حالة بسيطة اسمها النخالية البيضاء (pityriasis alba)
النخالية البيضاء بتظهر كبقع أفتح من لون الجلد الحواليها، وغالباً بنلقاها على الخدود وحول الفم، وأحياناً في الرقبة، والذراعين، وأعلى الجسم، حدودها ما واضحة وبتندمج بالتدريج مع الجلد الطبيعي، وعلى سطحها ممكن نلقى جفاف أو قشور ناعمة جداً، وأحياناً معاها حكة خفيفة لكن غالبا ما بتعمل أي أعراض نهائياً
الحالة دي بتظهر عند الأطفال بمختلف ألوان البشرة، غير انها بتظهر أكتر في بشرة أطفالنا الداكنة، لأنو النقص البسيط في الصبغة بعمل فرق واضح بين البقعة والجلد الحواليها، الفرق بزيد بعد التعرض للشمس، لمن الجلد السليم يغمق والبقعة تفضل فاتحة، عشان كده قلق الأسرة وأثر البقع على الطفل ممكن يكونوا أكبر من المرض ذاتو
النخالية البيضاء مرتبطة عند أطفال كتار بالأكزيما والاستعداد التأتبي (atopic diathesis)، ممكن تبدأ كالتهاب خفيف وجفاف بسيط، غير انو المرحلة الالتهابية الأولى في البشرة الداكنة ما دايماً بتظهر كحمرة واضحة، فالأهل ما بلاحظوها، لكن بعد ما الالتهاب يهدأ بفضل نقص مؤقت في اللون، وتكون البقعة الفاتحة أول حاجة بتلفت النظر
نفرقها من البهاق كيف؟
النخالية البيضاء فيها نقص جزئي في التصبغ (hypopigmentation)، يعني الصبغة لسه موجودة، غير انها أقل من الجلد الحواليها، لون البقعة غالباً أبيض باهت، وحدودها ضبابية، وممكن تكون معاها قشور خفيفة، أما البهاق (vitiligo) فغالباً بعمل بقعاً بيضاء ناصعة، فاقدة للتصبغ بصورة كاملة أو شبه كاملة، وحدودها واضحة، وما بكون فوقها قشور عادة
السعفة الملونة (pityriasis versicolor) برضو ممكن تعمل بقع فاتحة عليها قشور دقيقة، وغالباً بتكثر في الرقبة، وأعلى الصدر، والظهر، مع انو الوش ممكن يتأثر عند الأطفال، وفي نقص التصبغ بعد الالتهاب (post-inflammatory hypopigmentation)، أي أكزيما، أو جرح، أو عدوى سابقة ممكن تسيب لون أفتح بصورة مؤقتة بعد ما الالتهاب يختفي
النخالية البيضاء حالة سليمة، ما معدية، وما بتتحول لبهاق، اللون غالباً برجع بالتدريج، غير انو الرجوع ما فوري وممكن يحتاج شهور، هدف العلاج تهدئة الجفاف والالتهاب وتقليل فرق اللون، من غير كريمات تفتيح أو تقشير
الأساس مرطب لطيف بصورة منتظمة، مع واقي شمس مناسب للأطفال في المناطق المكشوفة، الواقي بقلل اسمرار الجلد السليم، وبالتالي بخفف التباين بينو وبين البقعة، لو في حكة، أو قشور، أو التهاب واضح، ممكن الطبيب يصف كورتيزون خفيف لفترة قصيرة، أو علاجاً غير كورتيزوني زي تاكروليمس (tacrolimus) أو بيميكروليمس (pimecrolimus)، خصوصاً في الوش، وحسب عمر الطفل والحالة، الأدوية دي مرخصة أساساً للأكزيما، واستعمالها للنخالية البيضاء بكون خارج النشرة (off-label)، وفي دراسات بتدعم فائدتها
لو ولدك ظهرت ليهو بقع فاتحة على الوش، ما تفزع وما تفترض طوالي انو عندو بهاق، وما تبدأ تجرب كل الكريمات الموجودة في الصيدلية، كشف واحد غالباً بفرق بين النخالية البيضاء البسيطة والحالات المحتاجة متابعة، خصوصاً لو البقع بيضاء ناصعة، وحدودها حادة، وبتتوسع، أو ظهر شعر أبيض جواها
في البوست الجاي حنمشي للبهاق (vitiligo) عند الأطفال، مرض جلدي ما معدي، وأثره النفسي والاجتماعي في البشرة الداكنة ممكن يكون كبير