الناس غالباً بتسمي أي طفح في منطقة الحفاض “حساسية حفاض”، لكن الحقيقة إنو أغلب الحالات عبارة عن تهيج ناتج من الرطوبة والاحتكاك والبول والبراز، جلد الرضيع رقيق، ولما المنطقة تفضل مبلولة ومقفولة، الحاجز الجلدي بضعف، والإنزيمات الموجودة في البراز بتهيج الجلد، والاحتكاك بيزيد المشكلة، فتظهر الخشونة والاحمرار أو الاسمرار واللسع
في البشرة الفاتحة الالتهاب بيظهر أحمر واضح، وفي بشرة أطفالنا الداكنة بظهر غامق؛ بنفسجي أو رمادي، أو مجرد جلد لامع وخشن ومؤلم، عشان كده بنركز على استجابة الطفل؛ لو الطفل ببكي مع الغسيل أو تغيير الحفاض، أو الجلد بقى خشن وساخن أو متسلخ، فده غالباً التهاب حتى مع غياب الحمرة الواضحة، وغالباً بيظهر على المناطق البارزة البتلامس الحفاض، زي المقعد، وأعلى الفخذين، وأسفل البطن، في البداية بيترك ثنيات الجلد سليمة نسبياً
العلاج الأساسي بيعتمد على إصلاح الحاجز الجلدي: تغيير الحفاض بسرعة، غسل المنطقة بماء فاتر أو تنظيف لطيف برفق، تنشيف بالطبطبة، وترك الجلد يتهوى براحته كل ما أمكن، بعدها بنخت طبقة سميكة من كريم حاجز زي zinc oxide أو فازلين، وبنحافظ على الطبقة دي في كل تغيير ونضيف فوقها عند الحاجة، وما نستعمل زيت الزيتون.
في خطوات بنستبعدها تماماً لأنها بتأخر العلاج: بنستبدل المناديل المعطرة أو الكحولية ببدائل لطيفة زي القطن والموية، الأطباء بينصحوا بتجنب استخدام البودرة تماماً لحماية رئة الطفل من خطر الاستنشاق ولأنها بتزيد من الاحتكاك لما تتبلل، بنتعامل مع الجلد بلطف شديد، وبنكتفي بالكريمات الموثوقة بعيداً عن الخلطات، وبنبتعد عن الكريمات المركبة البتحتوي على كورتيزون قوي ومضاد حيوي ومضاد فطري عشوائي (زي البانديرم)، لأنها بتعمل ترقق وتهيج وبتخفي العدوى الحقيقية
تقييم الطبيب بيلزم في حالة وجود حمى، خمول، رفض رضاعة، فقاعات أو بثور صديدية، تقرحات عميقة، نزف، ألم شديد، طفح خارج منطقة الحفاض، أو استمرار الطفح رغم العناية الجيدة، في الحالات دي الاحتمالات بتتوسع لتشمل عدوى بكتيرية، فطريات شديدة، أكزيما، صدفية، أو أمراض تانية
في البوست الجاي حنمشي للتفريق المهم بين التهاب الحفاض العادي وفطريات الحفاض، لأنو الاتنين بيجوا في نفس المكان، لكن العلامات والعلاج بيختلفوا عن بعض
#حكاية_جلد_الصغار
#عيادات_بيت_العافية
#عيادة_الجلدية_أون_لاين