في مواليد بنلاحظ عندهم بقعة وردية أو حمراء خفيفة في نص الجبهة أو بين الحاجبين أو فوق الجفن أو تحت الأنف، أو خلف الرقبة، البقعة دي بتظهر بوضوح أول لحظة يبكي فيها الطفل أو يسخن أو يتوتر، وده بخلي الأهل يفتكروا إنها التهاب جديد أو زيادة في المشكلة، الحالة دي اسمها Nevus simplex أو Salmon patch، والاوروبيين بسموها بالكتب “قبلة الملاك” لو في الجبهة أو الجفن، و“عضة اللقلق” لو خلف الرقبة، وهي عبارة عن توسع طبيعي وبسيط وسليم في الشعيرات الدموية السطحية
في البشرة الفاتحة بتظهر وردية أو حمراء واضحة، وفي بشرة أطفالنا الداكنة بتظهر كلون بنفسجي خفيف أو اسمرار وردي بسيط، وبتحتاج تركيز عشان تتلاحظ، البقعة دي بترتبط بالبكاء أو بعد الحمام أو مع الحر، وعشان نكون مطمنين، ظهورها في الأوقات دي يعتبر استجابة طبيعية جداً، العلامة المطمئنة إنو البقعة مسطحة تماماً، ملمسها ناعم ومطابق للجلد الطبيعي، حرارتها عادية، والطفل بواصل رضاعته ونشاطه بكل راحة، غالباً لما نضغط عليها برفق بتفتح شوية ثم ترجع للونها، لأنها من أوعية دموية سطحية
التعامل الأنسب معاها هو ترك الجلد بطبيعته والاعتماد على الوقت، لأن جسم الطفل بتولى تخفيفها بالتدريج، البقع الموجودة في الجبهة والجفون وبين الحاجبين بتخف تدريجياً وتختفي بوضوح خلال السنة الأولى أو الثانية، أما البقعة خلف الرقبة فممكن تفضل سنوات وتستمر بسلام كعلامة مميزة، ضروري نفرقها من الوحمة الخمرية Port-wine stain، الـ غالباً بتكون أغمق، واضحة الحدود، في جهة واحدة من الوجه، وبتحافظ على لونها وشكلها مع الزمن، وبتحتاج تقييم طبي لو كانت حول العين أو في منطقة كبيرة، برضو بنفرقها من الورم الوعائي Hemangioma الببدأ غالباً كبقعة صغيرة ثم يكبر ويبرز خلال الأسابيع أو الشهور الأولى
في حالات معينة بنحتاج التقييم الطبي المباشر، زي البقعة الكبيرة جداً، أو البتكون في جهة واحدة من الوجه، أو حول العين، أو البارزة وبتكبر بسرعة، أو الحصل فيها نزف أو تقرح، أو المصحوبة بتورم واختلاف في حجم جزء من الوجه
وبكده نكون ختمنا خريطة الطفح الطبيعي في أول 28 يوم، الشملت حبوب بتظهر من الولادة، وحبوب بعد يومين، وحبوب زي اللؤلؤ، وحمو النيل، والجلد الرخامي، والبقع الزرقاء، وقبلة الملاك، أغلبها بحتاج بس شوية صبر، والقاعدة الذهبية في جلد المولود بتقول إنو الطفل النشيط البرضع وحرارته طبيعية بحكي قصة تأقلم سليمة، وجود خمول أو ارتفاع في الحرارة أو رفض للرضاعة بيعتبر علامة لضرورة استشارة الطبيب
في المرحلة الجاية حنطلع من أول شهر وندخل في مشاكل الرضّع الأكثر شيوعاً، زي الحفاضات، الثنيات، الحر، الجفاف، وبداية الإكزيما
#حكاية_جلد_الصغار
#عيادات_بيت_العافية
#عيادة_الجلدية_أون_لاين