بعد ما عرفنا نختار الزيت المناسب، لازم نقيف عند تصرف بتكرر كتير؛ زولة أطراف شعرها ناشفة ومتكسرّة، فتقوم تدهن الفروة كل يوم، أو تكتم الراس تحت الطرحة بزيت تقيل، وبعدها تستغرب من الحكة والقشرة، السر دايماً بكون في اختيار المكان الصاح، الفروة عبارة عن جلد حي بيعرق وبيفرز دهونو الطبيعية، بينما الأطراف نسيج قديم وبعيد عن الزهم، وهي أكتر جزء عطشان ومحتاج حماية من الاحتكاك
الأطراف هي المكان المنطقي للزيت لأنها عاشت معاكي فترة طويلة وشافت شمس وغبار وحرارة، بعد خطوة الترطيب المائي، الزيت بجي كنقطة خاتمة بتقلل تبخر الموية وتدي انزلاق مريح، وضع الزيت باستمرار على الفروة بيعمل تراكم بيمسك العرق، وبيخلق بيئة دسمة ومثالية لخميرة المالاسيزيا عشان تتكاثر وتعمل قشرة دهنية، الحر والطرحة في جونا السوداني بضاعفوا الكتمة دي، فتبقي بتعالجي عطش الأطراف بإنك تخنقي جذور الشعر والفروة
تدليك الفروة لتحسين الدورة الدموية وفك التوتر خطوة ممتازة، وبتعتمد على حركة أطراف الأصابع اللطيفة، وبتحصل بكل سهولة ومفعول قوي من غير إضافة أي زيوت، ولو حابة تستفيدي من حماية الزيت قبل الغسيل، وزعيهو على ساق الشعرة والأطراف لفترة قصيرة قبل الدش لتخفيف تجريد الشامبو، واغسليهو بعدها، وخلي الفروة تتنفس من غير نقع ليلة كاملة
الطريقة العملية البتريحك بسيطة جداً؛ بعد الغسيل والشعر مندي، وزعي الليف-إن على الساق، وافركي نقطة أو نقطتين زيت في كفك لحدي ما يدفوا، وامسحي بيهم الأطراف، الكمية بتزيد شوية للشعر الخشن، وبتبقى مجرد أثر خفيف للشعر الرفيع، الفروة بتحتاج تنظيف وتهدئة، والأطراف بتحتاج عازل يحرسها، ولما ندي كل منطقة حاجتها بنشوف النتيجة الحقيقية للزيت
في الحلقة الجاية حنمشي للجلسرين في جو ناشف: ليه مادة ممتازة في الترطيب ممكن تسحب الموية من شعرك لو الهواء حولك جاف؟
#حكاية_الشعر
#عيادات_بيت_العافية
#عيادة_الجلدية_أون_لاين