الزيوت جزء أساسي من روتين الشعر السوداني: سمسم، جوز هند، خروع، كركار، وغيرها، لكن قبل ما نفصل فيها، في حقيقة علمية قاطعة لازم نثبتها بوضوح: ما في أي زيت في الدنيا وظيفتو يأمر البصيلة تطلع شعر جديد، الزيت ما علاج للصلع ولا سحر للإنبات، الزيت أداة حماية فيزيائية لساق الشعرة بتقلل تكسرها، ولمن التكسر يقل، الشعر بيحتفظ بطولو
السر العملي لنجاح الزيوت بيعتمد على حجم جزيئاتها وقدرتها على اختراق ساق الشعرة، عشان نستوعب الفكرة، تخيلي الزيوت دي كـ «طيف متصل» بيبدأ من الزيوت البتدخل جوه العمق، وينتهي بالزيوت البتقعد كحارس بره:
١- الزيوت شديدة النفاذية (البتدخل لعمق الشعرة):
النجم الأول هنا هو زيت جوز الهند، جزيئاته صغيرة جداً وميلها لبروتين الكيراتين عالي، فبدخل لعمق ساق الشعرة ويحميها من الإجهاد المائي وفقدان البروتين، مكانه المثالي هو خطوة الحماية المسبقة (Pre-poo) لمدة قصيرة قبل الدش
٢- الزيوت شبه النافذة (بتدخل جزئياً وتغلف السطح):
هنا بنلقى زيت عباد الشمس، وهو زيت خفيف وممتاز جداً لتليين الشعرة من جوه وبره بمرونة بدون تتقيل، وبشاركو في الخانة دي زيت الزيتون، وزيت السمسم البلدي (رفيق الوجدان السوداني والأساس في الكركار)، وكلها زيوت بتجمع بين الترطيب الداخلي والختم الخارجي، وغنية بمضادات الأكسدة
٣- الزيوت الخاتمة الخفيفة (بتقعد فوق السطح):
جزيئاتها أكبر، وظيفتها الأساسية تقعد فوق حراشف الكيوتيكل فتقفل الرطوبة وتدي انزلاق، بتشمل زيت الجوجوبا (البشبه في تركيبته زهم الجلد الطبيعي)، وزيت الأرغان، وزيت اللوز الحلو، دي زيوت بتدي لمعة وختم ناعم وممتازة للشعر الرفيع لأنها ما بتلبدو
٤- الزيوت الخاتمة الثقيلة والمعدنية (العازل القوي):
في نهاية الطيف بنلقى الزيوت البتعمل أقوى طبقة عازلة وما بتدخل الشعرة نهائياً،مثلا زيت الخروع بتميز بلزوجة وكثافة بتحرس الأطراف شديدة الجفاف، ومعاهو الزيوت المعدنية (Mineral oil) والفازلين (Petrolatum)؛ ورغم سمعتها المظلومة، الزيوت المعدنية بتعتبر درع فيزيائي ممتاز بيحبس الموية جوه الشعرة ويمنع الاحتكاك، ومكانها الأنسب هو ختم الأطراف الكثيفة والجافة جداً
التعامل مع الفروة بيحتاج انتباه؛ الفروة جلد حي بفرز دهونه الطبيعية، وتكديس الزيوت عليها بخلق بيئة خصبة لخميرة المالاسيزيا وظهور القشرة الدهنية، الاستخدام الصحيح دايماً بخلي الزيت على ساق الشعرة والأطراف، بعد خطوة الترطيب المائي (الكريم أو الليف-إن) عشان يقفل عليهو
الزيت أداة ذكية بتكمل دور منتجاتك المائية، وفي الحلقة الجاية حنفصل كيف تختاري الزيت المناسب لسمك شعرك ومساميته، وكيف توازني استخدام زيوتك في أيام الصيف والهبوب لتفادي التراكم والتلبيد
#حكاية_الشعر
#عيادات_بيت_العافية
#عيادة_الجلدية_أون_لاين