في موجة منتشرة وسط ناس العناية الطبيعية بالشعر بتقول: «خلي الشامبو، واغسلي شعرك بالموية بس»، والفكرة شكلها مغري، خصوصاً للزولة الشعرها كيرلي أو مجعد وبتطلع من كل غسلة بشعر قاسي ومتشابك، فتقول يمكن المشكلة كلها في الشامبو، ويمكن الموية براها كفاية، وطبعا الموية مهمة، وما في ترطيب من غير موية، لكن السؤال هنا ما عن الترطيب، السؤال عن التنظيف، والتنظيف عندو كيمياء مختلفة شوية
فروة الراس بتطلع زهم (sebum)، وده دهن طبيعي بحمي الجلد، لكن علمياً الدهون دي ما بتحب الموية، فهي ممكن تشطف العرق والأملاح والتراب الخفيف، لكنها ما بتذيب الزيت ولا بتشيل تراكم المنتجات والسيليكون، عشان كده الغسيل بالموية براها مرات بدي إحساس مؤقت بالراحة؛ لأن الموية بتلين الشعر المجعد، وتعيد توزيع جزء من الزهم على الساق، فتطلع الأطراف أقل جفافاً في البداية
لكن بعد أسابيع بتبدأ القصة التانية: فروة بتعمل حكة، قشرة دهنية، وريحة كتمة، لأن خميرة «المالاسيزيا» (Malassezia) الموجودة طبيعياً في جلدنا بتتغذى على تراكم الدهون ده، ولما تزيد عن حدها بتعمل التهاب وحكة، عشان كده، لو ما في مادة منظفة فيها سرفكتانت (surfactant)—يعني مادة بتعرف تمسك الزيت والموية مع بعض وتخليهم ينزلوا مع الشطف—التراكم غالباً حيفضل مستمر
ولأننا بنفتش لحل يريح الأطراف الناشفة من غير ما يخنق الفروة، ظهرت فكرة الكو-واش (Co-washing)، أو الغسيل بالبلسم بس، فكرة الكو-واش إنك تستعملي بلسم مخصص للغسيل (أو بلسم خفيف خالي من السيليكونات التقيلة) لتنظيف الفروة بدل الشامبو، البلسم ده بيحتوي على نسبة بسيطة جداً من مواد تنظيف لطيفة (Mild Surfactants) أو منظفات كاتيونية، بالإضافة لكمية كبيرة من المرطبات ومواد الانزلاق
لما تدلكي بيهو الفروة، هو بيشيل العرق والتراب الخفيف وجزء من الزيت بفضل الاحتكاك والمواد اللطيفة دي، وفي نفس الوقت بيغلف الأطراف ويرطبها ويسهل تسريحها من غير ما يجردها زي الشامبو، عشان كده الكو-واش خيار ممتاز وسريع لوسط الأسبوع، أو للزولة البتتمرن وبتعرق كتير، أو في أيام الغبار الخفيف
لكن الكو-واش ذاتو ما سحر، وما ينفع يكون روتينك الوحيد والأبدي، لأنه أضعف من الشامبو في إزالة الزيوت التقيلة وجزيئات الغبار الناعمة، ومعادن الموية العسرة، فلو اعتمدتي عليهو شهور طويلة براهو، حيتراكم البلسم نفسو فوق الفروة وساق الشعرة، والشعر حيبدأ يتقل ويفقد لمعتو، والبلسم ما حيدي نفس النتيجة القديمة
الحل الأذكى ما في طرف «شامبو قوي كل مرة» ولا في طرف «موية أو بلسم بس للأبد»، الحل في التوازن: تخلي الغسيل الأساسي أسبوعياً أو كل عشرة أيام بشامبو لطيف ينضف الفروة كويس، وتدخلي الكو-واش أو الشطف الخفيف لو احتجتي ترطيب ونظافة سريعة وسط الأسبوع، وتعملي تنظيف عميق بالشامبو كل فترة لو حسيتي بتراكم
في الحلقة الجاية حنمشي للشامبو نفسو: وظيفتو شنو؟ وليه بعض الشامبوهات بتخلي الشعر المجعد قاسي ومتشابك من أول غسلة؟
#حكاية_الشعر #عيادات_بيت_العافية #عيادة_الجلدية_أون_لاين