مرات الزولة بتعمل كل صاح بمثالية: تغسل بهدوء وتستعمل بلسم كويس وترطب وتختم الأطراف وتقلل التسريح على الناشف، ومع دا كلو تحس شعرها باهت وخشن ومكتوم، وما بمسك الترطيب زي الأول، هنا لازم ننتبه لسؤال بسيط لكن مهم في السودان: إنتي بتغسلي شعرك بياتو موية؟
الموية ما كلها واحدة، وده كلام بنعرفو في الطعم والغسيل، لكن مرات ما بنربطو بالشعر، في موية لينة نسبياً، وفي موية عسرة، وعسر الموية معناهو إنو فيها معادن ذائبة بكمية أعلى، خصوصاً الكالسيوم والمغنيسيوم، ودي معادن ما بتظهر للعين في الكباية، لكنها مع الغسيل المتكرر ممكن تسيب أثر سالب فوق ساق الشعرة، السر العلمي ورا الالتصاق ده إنو الشعر التالف أو المجهد شحنتو الكهربائية بتكون سالبة، وفي المقابل أيونات الكالسيوم والمغنيسيوم شحنتها موجبة وثنائية التكافؤ، فبحصل تجاذب كهروستاتيكي قوي بيمسك المعادن دي في الطبقة الخارجية للشعرة وما بخليها تنزل بالموية العادية
موية النيل غالباً لينة نسبياً مقارنة بموية آبار كتيرة، أما موية البير في مناطق عديدة ممكن تكون أعسر، وطبعا موية البحر زي في بورتسودان هي الأكثر عسرا، وأحياناً بتصل مستويات العسر لحوالي 200–300 ملغم/لتر حسب المنطقة والمصدر، وده بفرق في الشعر لأن المعادن دي بتترسب على الكيوتيكل (cuticle)، الطبقة الخارجية الحامية، وتعمل طبقة رقيقة تخلي ساق الشعرة تبقى ناشفة ومكتومة حتى لو عملتي بلسم وزيت
وغير الكالسيوم والمغنيسيوم، موية الآبار مرات بكون فيها نحاس وحديد، الأول بتراكم جوة قشرة الشعرة وبعمل كمحفز لتوليد الجذور الحرة لمن الشعر يتعرض للشمس، وده بسرع تكسر الروابط الداخلية، أما الحديد فبيدي الشعر ملمس معدني خشن وبيغير لونو وخليهو باهت ومائل للصدأ
والمشكلة بتزيد بسبب إنو موية البير العسرة غالباً بتكون قلوية التفاعل، ورقمها الهيدروجيني بيكون عالي بين 7.5 و 8.5، في حين إنو الرقم الهيدروجيني المثالي لاستقرار الشعرة بكون حامضي خفيف بين 3.67 و 5.5، فالقلوية دي بتخلي حراشف الكيوتيكل تنتفخ وتتفتح، وتسمح للمعادن تدخل وتتلصق أكتر، ولما تستعملي شامبوهات تقليدية أو صابون عادي مع الموية العسرة، المعادن دي بتدخل في تفاعل كيميائي مع الأحماض الدهنية وبتكون طبقة شمعية غير قابلة للذوبان بتشبه الصابون المتكتل، الطبقة دي بتلصق فوق الشعرة وبتمنع أي ترطيب يدخل
الفكرة ما إنو الموية العسرة «بتسمم» الشعر، الكلام أدق من كده، المشكلة الأساسية إنو المعادن والطبقة الشمعية دي بتقعد فوق الشعرة، فتخلي السطح أخشن، واللمعة أقل، والانزلاق أضعف، ولمن الانزلاق يقل، المشط حيمسك، والاحتكاك حيزيد، والتكسر حيلقى طريقو ليك
والأثر ده بكون أوضح في الشعر الكيرلي والمجعد، لأنو أصلاً ناشف تركيبياً، والزهم الطبيعي ما بصل للأطراف بسهولة، ولأن اللفات بتدي المعادن والمنتجات والغبار أماكن أكتر تمسك فيها، عشان كده الزولة البتغسل شعرها بموية بير عسرة وبتعيش في جو جاف ومغبر، ممكن تحس إنو شعرها محتاج ترطيب كل يوم، مع إنو جزء من المشكلة بكون تراكم معادن فوق ساق الشعرة
علامات الترسبات مرات بتشبه الجفاف: شعر باهت وملمس خشن وكيرلات ما بتتشكل كويس، والبلسم يبقى ما بدي نفس النتيجة القديمة، والفروة متلبدة، أو بإحساس إنو الشعر عليه طبقة ما بتروح بالغسيل العادي، هنا ما الحل طبعا ما هو زيادة الزيت ساي، لأن الزيت فوق الترسبات بشبه إنك تلمّعي شباك عليه غبار، ممكن يلمع لحظة، لكن الوسخ لسه موجود
الخطوة الأهم إننا نفرق بين التنظيف العميق (clarifying) والاستخلاب (chelating)، التنظيف العميق بساعد يشيل تراكم المنتجات والزيوت والسيليكون زي شامبو نيتروجينا للتنظيف العميق (Neutrogena Clarifying)، أما الاستخلاب ففكرتو إنو بستهدف المعادن ذاتها، بمواد رابطة زي إي دي تي إيه (EDTA) أو حمض الفيتيك أو الجليكوآمين، المواد دي بتمسك المعادن زي المغناطيس وتساعدها تنزل مع الشطف، وفي منتجات ممتازة للاستخلاب، زي شامبو لوريال ميتال ديتوكس (L'Oréal Metal Detox) اللي بيسحب النحاس والمعادن، أو ماليبو سي (Malibu C Hard Water) المتخصص في موية الآبار، أو بول ميتشل شامبو ثري (Paul Mitchell Shampoo Three)، وحتى خيارات بتجمع بين التنظيف والاستخلاب اللطيف زي كي ايتين ديتوكس (K18 Detox) وأواي ديتوكس (Ouai Detox)
بس برضو ما نحولو لعقوبة أسبوعية للشعر، شامبو الاستخلاب قوي نسبياً، ومكانو هو كل فترة حسب الحاجة، ما كل غسلة، وبعدو لازم بلسم كافي، ويفضل ترطيب أهدأ للأطراف، لأن إزالة الترسبات من غير إعادة انزلاق ممكن تخلي الشعر يحس بجفاف مؤقت، خصوصاً الشعر المجعد
وفي نقطة مهمة للإنصاف العلمي: ترسب المعادن على الشعر معروف ومعقول، وتأثيرو على البهتان والخشونة والإحساس بالجفاف واضح عملياً، لكن موضوع إنو العسر بضعف قوة الشعرة مباشرة من جوة لسه فيهو اختلاف، عشان كده ما بنبيع الخوف، بنقول الحاصل بدقة: الموية العسرة بتعمل ترسبات وبترفع معامل الاحتكاك، والاحتكاك هو العَدُو اللي بيزيد التكسر، لكن ده بختلف من زولة للتانية حسب طبيعة الشعر والموية
عشان نقلل المشكلة دي في خطوات عملية ومقدور عليها حتى من غير شامبوهات متخصصة، وأولها حماية الشعر قبل الغسيل، يعني تدهني أطراف شعرك بطبقة خفيفة من زيت نافذ زي زيت جوز الهند أو بلسم قبل الدش بنص ساعة، عشان تقللي تشرب الشعر للموية العسرة وتعملي عازل يقلل الالتصاق، والحل المنزلي الذكي والأوفر هو الشطفة الحامضية في آخر الغسيل، باستخدام محلول مخفف جداً من خل التفاح أو ملح الليمون، لأن الوسط الحامضي بيذيب كربونات الكالسيوم وبيرجع يقفل حراشف الكيوتيكل فوراً فبترجع اللمعة والانزلاق، وكمان يفضل إنو الكريم أو الليف-إن (Leave-in) البتختيهو بعد الغسيل يكون حامضي خفيف
أما لو دايرة حل جذري للمنزل، فالفلاتر العادية البتتركب في الدش بتشيل الكلور والصدأ وبتخفف الأكسدة وده ممتاز، لكنها علمياً ما بتزيل عسر الموية، والحل الحقيقي للعسر هو أجهزة التبادل الأيوني اللي بتتركب في الخط الرئيسي أو الخزان وتستبدل الكالسيوم بالصوديوم
لو بيتكم معتمد على موية بير، أو لاحظتي إنو الشعر بقى مكتوم بعد تغيير السكن أو السفر، فكري في الموية كجزء من القصة، ما كمتهم وحيد، المهم إنك ما تفسري كل نشاف كفشل منك أو نقص زيت
بكده نكون ختمنا قسم البيئة: الحر والجفاف بسحبوا الموية، الشمس بتضعف البروتين واللون، الغبار بتراكم ويزيد الاحتكاك، والموية العسرة ممكن تسيب معادن فوق ساق الشعرة، في الحلقة الجاية حنرجع خطوة بسيطة للوراء ونشرح عن الشعر أكتر حسب تفاعلاتكم قبال نواصل عن الغسيل وفلسفتو
#حكاية_الشعر #عيادات_بيت_العافية #عيادة_الجلدية_أون_لاين