في زول بجيك بوجع غريب جداً في طرف الإصبع، شهور طويلة، مرات سنين، الألم ما واضح في الجلد، وما في جرح، وما في صديد، والظفر نفسو ممكن يكون شكله قريب من الطبيعي، والزول بقول: يا دكتور، الألم ده كأنو كهرباء صغيرة في نقطة واحدة، وأي موية باردة بتقلب اليوم كلو عذاب
دي واحدة من الحالات النادرة، ودراماتيكية في نفس الوقت، اسمها ورم القلوموس (Glomus tumor/ورم القلوموس، في الغالب هو ورم حميد صغير جداً، بطلع غالباً تحت الظفر، في منطقة فيها أجسام صغيرة مسؤولة عن تنظيم حرارة طرف الإصبع، اسمها جسم القلوموس (Glomus body/جسم القلوموس) ، الورم ممكن يكون حجمو مليمترات، وما باين للعين بسهولة، وده السبب البخلي التشخيص يتأخر
علامتو الأشهر ثلاثية واضحة: ألم نقطي شديد في نقطة محددة، وحساسية شديدة للبرد، وألم قوي لمن تضغط على نفس النقطة، مرات بنشوف احمرار أو لون بنفسجي خفيف تحت صفيحة الظفر (nail plate/صفيحة الظفر)، ومرات ما بنشوف حاجة كلو كلو
في العيادة في اختبارات بسيطة بتقرب التشخيص، اختبار لوف (Love’s pin test/اختبار لوف) بنعمل فيه ضغط دقيق على النقطة المؤلمة، واختبار البرد (Cold sensitivity test/اختبار حساسية البرد) بيثير الألم بالثلج أو الموية الباردة، واختبار هيلدريث (Hildreth’s test/اختبار هيلدريث) بساعدنا نعرف هل الألم متعلق بالدورة الدموية الصغيرة في المنطقة
التأكيد غالباً بكون بالتصوير بالرنين المغناطيسي (MRI/التصوير بالرنين المغناطيسي)، لأن الورم صغير ومكانه مخفي تحت الظفر، والخبر المطمئن إنو العلاج في العادة جراحي وشفائي، بإزالة الورم بدقة مع المحافظة قدر الإمكان على الظفر والمصفوفة (nail matrix/مصفوفة الظفر) ، عشان نقلل احتمال تشوه الظفر بعد العملية
أي ألم نقطي شديد تحت الظفر، يزيد مع البرد والضغط، وما لاقي تفسير لشهور، ما يتعامل كألم عادي أو حساسية ساكت، أحياناً معرفة الاسم الصحيح للمرض هي نصف العلاج، لأن الزول البعرف إنو الألم ده عندو سبب صغير ومحدد، بطلع من دوامة سنوات من القلق والتجريب
#حكاية_الظفر #عيادات_بيت_العافية #عيادة_الجلدية_أون_لاين