زول عندو حب شباب متوسط، الحبوب حمراء وملتهبة وموزعة في الوش والضهر، الطبيب كتب ليهو دوكسيسيكلين، استخدمو شهر، البشرة بدأت تهدأ، ففرح وقال: "خلاص اتحسنت"، ووقف العلاج، بعد شهرين، رجعت الحبوب بقوة، رجع لنفس المضاد الحيوي، لكن المرة دي ما اشتغل زي أول مرة، قصة متكرره للأسف، لأن المضادات الحيوية في حب الشباب ما مفروض تُفهم كأنها علاج عادي بنبدأو ونوقفو بمزاجنا، هي سلاح مؤقت، قوي ومفيد، لكن لو اتستخدم غلط ممكن يدرب البكتيريا على المقاومة، وبعدها السلاح ذاته يبقى أضعف
أشهر مضاد حيوي فموي بنستخدمو في حب الشباب هو الدوكسيسيكلين (Doxycycline)، غالباً بنكتبو في الحالات المتوسطة الملتهبة، خصوصاً لمن الحبوب تكون كثيرة، مؤلمة، أو منتشرة في الوجه والضهر والصدر، الجرعات الشائعة بتكون بين 50 إلى 100 ملغ مرتين يومياً، حسب الحالة والتحمل والخطة العلاجية، قوته ما بس في إنو يقلل البكتيريا، لكن كمان لأنو بقلل الالتهاب، ودي نقطة مهمة جداً لأن حب الشباب في فهمو الحديث مرض التهابي قبل ما يكون مجرد قصة بكتيريا
بعد الدوكسيسيكلين عندنا المينوسيكلين (Minocycline)، فعال، وما بننكر فعاليتو، لكن أطباء كتار بقوا أكثر تحفظاً معاه لأن آثارو الجانبية أكثر إزعاجاً، ممكن يسبب تصبغ أزرق أو رمادي في الجلد أو اللثة أو مناطق تانية، وفي حالات نادرة ممكن يعمل التهاب كبد أو حالة شبيهة بالذئبة الحمراء بسبب الدواء، عشان كده ما بنختارو ساكت لمجرد إنو موجود، بنحتاج سبب واضح
أما الأحدث في العائلة فهو الساريسيكلين (Sarecycline)، تمت الموافقة عليهو سنة 2018، وميزتو إنو ضيق الطيف، يعني ما بضرب بكتيريا الجسم كلها بعنف زي المضادات الواسعة، الفكرة هنا إننا نحاول نعالج حب الشباب ونحافظ قدر الإمكان على بكتيريا الأمعاء النافعة، كمان معتمد من عمر تسعة سنوات فما فوق، وجرعتو بتتحسب بالوزن، تقريباً 1،5 ملغ لكل كيلوجرام يومياً، لكن مشكلتو العملية لينا إنو حالياً ما متوفر في السودان بصورة عادية، وغالباً لو اتوفر بكون عبر الاستيراد وبسعر عالي
لكن أهم من اسم المضاد الحيوي هي القواعد الذهبية:
أول قاعدة: المضاد الفموي ما علاج مفتوح الزمن، الحد الأعلى غالباً تلاتة إلى أربعة شهور، ما في قصة "أواصل عليه سنة عشان الحبوب ما ترجع"، لو وصلنا للمدة دي ولسه محتاجين سيطرة، بنراجع الخطة ونمشي لخيار تاني، زي العلاج الهرموني عند النساء ببعض الحالات، أو الآيزوتريتينوين في الحالات الأشد، أو صيانة موضعية قوية
القاعدة التانية: ما تستخدم المضاد الحيوي براهو أبداً، لازم يكون معاه علاج موضعي، وخصوصاً البنزويل بيروكسيد (BPO)، لأنو بقلل فرصة المقاومة البكتيرية، المضاد براهو زي جندي دخل المعركة من غير حماية، ممكن يكسب أول يوم، لكن بعد فترة العدو يتعلم أسلوبو
القاعدة التالتة: التتراسيكلينات، ودي العائلة الفيها الدوكسيسيكلين والمينوسيكلين والساريسيكلين، ممنوعة في الحمل، وممنوعة للأطفال أقل من تمانية سنوات، لأنها ممكن تأثر على الأسنان والعظام في العمر ده، عشان كده أي بنت في سن الإنجاب لازم يكون سؤال الحمل جزء من الخطة، ما تفصيلة جانبية
وبرضو لازم نتكلم عن الأعراض الجانبية لأنها في بلد زي السودان ما بسيطة، الدوكسيسيكلين ممكن يزيد حساسية الجلد للشمس، ودي نقطة كبيرة عندنا، عشان كده واقي الشمس SPF 50+ جزء من الأمان، وممكن يعمل اضطراب معدة، فالأفضل يتاخد مع الأكل وكباية مويه كبيرة، والأهم إنو ما يتاخد والزول نايم أو قبل النوم مباشرة، لأنه ممكن يسبب التهاب مؤلم في المريء، بعد الجرعة، اقعد أو أقيف على الأقل تلاتين دقيقة
وللحوامل والأطفال اللي ما بقدروا ياخدوا تتراسيكلين، أو للبتعبهم التتراسايكلينات، في بدائل فموية ممتازة، أبرزها الأزيثرومايسين، وهو موضوع المنشور الجاي
#حكاية_حب_الشباب #عيادات_بيت_العافية #عيادة_الجلدية_أون_لاين