الاعتقاد الشائع بأن المضاد الحيوي هو أقوى سلاح ممكن ضد حب الشباب، بتعارضوا مفاجأة إنو واحد من أهم أدوية حب الشباب الحديثة ما مضاد حيوي أصلاً، ومع ذلك قدر يعمل الحاجة العجزت عنها مضادات حيوية كتيرة،
البنزويل بيروكسيد (Benzoyl Peroxide)، أو الـ BPO زي ما بنختصرو أحياناً، عندو قصة مختلفة شوية، البكتيريا الجلدية المرتبطة بحب الشباب عاشت عشرات السنين وهي بتتعلم كيف تقاوم المضادات المختلفة، لكن لحدي الليلة ما قدرت تطور مقاومة حقيقية للبنزويل بيروكسيد
السبب إنو البنزويل بيروكسيد ما بشتغل بطريقة المضادات الحيوية المعروفة، هو لمن يتمسح على الجلد بطلع جزيئات أكسجين نشطة جوا البصيلة، والبكتيريا دي من الكائنات البتفضل البيئة الفقيرة بالأكسجين، فوجود الأكسجين الكتير بعمل ليها حالة أقرب للاختناق، عشان كده عددها بنقص بسرعة، وما بتلقى فرصة تطور حيل دفاعية زي الحاصل مع المضادات الحيوية
لكن أهميته ما واقفة هنا بس، فواحدة من أكبر المشاكل في علاج حب الشباب خلال العقود الفاتت كانت ظهور بكتيريا مقاومة بسبب الاستعمال الطويل للمضادات الحيوية الموضعية، عشان كده الإرشادات الحديثة بقت واضحة جداً: أي مضاد حيوي موضعي لازم يكون مع البنزويل بيروكسيد أو الريتنويد، وما يُستعمل براهو، وجود البنزويل بيروكسيد جنب المضاد بقلل احتمال ظهور المقاومة بصورة كبيرة
عشان كده حتلقى معظم التركيبات الحديثة الناجحة فيها BPO مع مادة تانية، لأنو بشتغل كأنو الحارس الواقف في الباب يمنع البكتيريا من إعادة تنظيم صفوفها
طبعاً الدوا ما مثالي زي أي حاجه تانية، وأكثر مشكلة بنشوفها معاه هي الجفاف والتهيج، خصوصاً في البداية أو عند الناس البستعملوا تركيزات عالية من أول يوم، وبرضو عندو عادة مزعجة شوية: ممكن يبهت لون الملابس والمخدات والمناشف لو ما انتبهنا ليهو، وعندو مشكلة مع السخانة، ممكن يبوظ بسرعه لو ما اتخزن في مكان بارد.
عشان كده البداية الهادية غالباً أحسن من الحماس الزائد، كمية قليلة، واستعمال منتظم، مع مرطب مناسب، بتدي نتائج أحسن من استعمال عنيف يخلي الزول يوقف العلاج بعد أسبوع
والحاجة المهمة البغلطوا فيها الناس إنو البنزويل بيروكسيد ممتاز في السيطرة على الحبوب الالتهابية الحمراء، لكن براهو ما بقدر يحل مشكلة الانسداد العميق داخل البصيلة، عشان كده نادراً ما بنعتمد عليهو براهو في العلاج الحديث
طريقة الاستعمال والتراكيز بتعتمد على حدة الحالة والموضع، لحب الشباب المتوسط للشديد، في الوش بنستعمل كريم 2.5 -5 % في الأول يوم بعد يوم لحدي مرتين يوميا حسب التحمل وفي الجسم 5 – 10% كغسول، وممكن نغسلوا بعد دقيقتين لخمسة دقائق في الوش، وبعد دقيقتين أثناء الاستحمام للجسم، وممكن نستعمل غسول للوش بدل الكريم للبشرة الحساسة، أما البشرة اللي بتستحمل فممكن نخليهو طوالي للصباح
بنبدأ نشوف النتائج بعد أسبوعين تقريبا لكن لازم نستمر لشهرين أو 3 شهور وممكن بعدها يخش مرة مرة كوقاية طويلة الأمد لأنو ما بعمل مقاومة، وما ننسى أنو الكمية تكون بسيطة (حجم حبة بازلاء) ونوزعو على مناطق ظهور الحبوب كلها ما بس فوق الحباية الملتهبة.
بالمنشور الجاي حنتعرف على الخيارات الموضعية التانية لأنو الدوا ده للأسف رغم أهميتو ما متوفر بالسودان، ونرجو أنو يتم استيرادو وتوفيره لأهميته البالغة في علاج حب الشباب
#حكاية_حب_الشباب #عيادات_بيت_العافية #عيادة_الجلدية_أون_لاين