في حبوب بنصنعها بايدينا، كل يوم، لما نستخدم كريمات بتدي بياض سريع، ونعومة مؤقتة، ولمعة بتخدع العين، وبعد أسابيع أو شهور تفتح باب طويل من الالتهاب والتصبغ والتعب
كريمات التفتيح والخلطات المنتشرة في السوق السوداني كتير منها بكون فيهو كورتيزون قوي، أحيانا بأسماء تجارية بريئة، وأحيانا داخل خلطات ما مكتوب عليها أي مكونات، الكورتيزون في البداية بدي إحساس مريح، وبقلل الاحمرار، ويفتح اللون مؤقتا، ويخلي الجلد ناعم، عشان كده الزول بفتكر إنو لقى الحل، ثم بعد فترة، الجلد يبدأ يدفع الفاتورة الباهظة
حب الشباب المصنوع بالكورتيزون، أو حب الشباب الستيرويدي (steroid acne)، غالبا بجي كحبوب صغيرة متشابهة، حمراء أو قيحية، طالعة فجأة في الوش أو الصدر أو الظهر، وفرقو المهم عن حب الشباب العادي إنو غالبا ما فيهو رؤوس سوداء ورؤوس بيضاء واضحة، يعني ما في كوميدونات بتقود القصة من البداية، بل في انفجار متشابه كأن الجلد كله تلقى نفس الأمر في نفس الوقت
الكورتيزون بعمل حاجتين خطيرتين في الجلد، من ناحية بضعف الحاجز الطبيعي، فيخلي الجلد أرق، وأكثر حساسية، وأكثر قابلية للالتهاب، ومن ناحية تانية بغيّر توازن الميكروبيوم وبهديء المناعة المحلية بطريقة مزيفة، فتلقى البكتيريا والمالاسيزيا فرصة تكبر في مكان ما كان مفروض تتمدد فيهو، عشان كده ممكن نشوف معاهو حبوب، والتهاب حول الفم، وفطريات متدسية، وشعيرات دموية ظاهرة، وتهيج مستمر
المشكلة الأكبر إنو الإيقاف المفاجئ أحيانا بعمل انتكاسة مخيفة: احمرار، ولسعة، وحبوب أكتر، وشعور إنو الجلد "طالب الكريم"، هنا الناس برجعوا للكورتيزون تاني، ويدخلوا في دائرة اعتماد صعبة
الخروج من الدائرة دي بحتاج خطة هادئة، عبرها نوقف الخلطات، ونرمم حاجز البشرة، ونعالج الحبوب أو الفطريات المصاحبة حسب التشخيص، ونحمي الجلد من الشمس عشان التصبغ ما يثبت أكتر، وفي البشرة السمراء، كل يوم زيادة مع الكورتيزون ممكن يعني أثر داكن أطول وندبة أصعب
وبعد كريمات التفتيح، لازم نفتح ملف الحبوب الشبيهه بحب الشباب وما هي بحب شباب
#حكاية_حب_الشباب #عيادات_بيت_العافية #عيادة_الجلدية_أون_لاين