في حبوب شكلها بقول إنها حب شباب، لكنها في الحقيقة مجرد تقليد شديد الإقناع ليهو، فيها الجلد بطلع بثور رتيبة ومتشابهة في الوش أو الصدر أو الضهر، والزول بدخل في رحلة الغسولات والمضادات والمقشرات، بينما المفتاح الحقيقي ما في البصيلة براها، بل في دواء متزامن أخدو، أو مادة كيميائية اتعرض ليها، أو مرض تاني متفاقم تحت السطح
النوع ده بنسميهو الطفح الشبيه بحب الشباب (acneiform eruption)، كلمة "شبيه" هنا مهمة، لأن الفرق الأساسي إنو غالبا ما في كوميدونات، يعني ما في رؤوس سوداء ورؤوس بيضاء، بتلقى الحبوب طالعة كأنها نسخة واحدة مكررة، بنفس الحجم والشكل، وفجأة بعد بداية دواء معين
من أشهر الأمثلة الطفح البجي مع الليثيوم (lithium) اللي ممكن يفاقم حب شباب موجود أو يطلع طفح شبيه بيهو، وبعض مضادات الصرع زي فينيتوين (phenytoin)، وحتى فيتامينات باء ستة وباء اتناشر (B6/B12) بجرعات عالية، ممكن تدخل في القصة عند بعض الناس
في الطرف الأندر والأغرب، في حالة اسمها كلورأكني (chloracne)، بتحصل بعد التعرض للديوكسين والمركبات الكلورية، شكلها مختلف، فيها كوميدونات كثيرة في الخدود، خلف الأضان، الإبط، والفخذ، دي اتشهرت عالميا بعد تسمم الرئيس الأوكراني فيكتور يوشينكو سنة 2004، لمن ظهر على وشو طفح شديد بعد تعرضه للديوكسين
وبرضو لازم ما ننسى التهاب الغدد العرقية القيحي (hidradenitis suppurativa)، العندو عقد وخرّاجات وأنفاق في الإبط والفخذ، لأنه قريب من طيف انسداد البصيلات، لكنه ما حب شباب وش عادي، وعلاجو مختلف تماما
وفي البوست الجاي حنرجع نكمّل المحاكيات: عثة المسام (Demodicosis) والتهاب الجريبات البكتيري، لأنهم من أكثر الحاجات البتلخبط الخطة العلاجية لو اتسمّوا حب شباب بالغلط
#حكاية_حب_الشباب #عيادات_بيت_العافية #عيادة_الجلدية_أون_لاين