العمر بغير معنى الحبوب، نفس البثرة الصغيرة، لو ظهرت في خد طفل عمره شهرين ممكن تكون سحابة عابرة، ولو ظهرت في طفل عمره أربعة سنين ممكن تفتح باب تفتيش كامل، عشان كده في الجلدية، بنسأل الحبوب ظهرت متين بشكل أساسي
في الأسابيع الأولى من الحياة، ممكن يظهر نوع بسيط في وش الرضيع، وغالبا بكون مرتبط بتغيرات مؤقتة في الجلد والميكروبات الساكنة فيهو، وأحيانا يكون أقرب لالتهاب جريبات خفيف مرتبط بالمالاسيزيا (Malassezia) منو لحب الشباب الحقيقي، في الغالب بيهدأ براهو، وما بحتاج كريمات قوية ولا خلطات ولا تجارب فوق جلد لسه جديد وحساس
بعد عمر تلاتة شهور تقريبا، الموضوع بحتاج انتباه أكتر، حب الشباب في الرضّع بين عمر تلاتة شهور وسنة ممكن يكون حقيقي، بتظهر فيهو كوميدونات وبثور ملتهبة، وأحيانا بترك أثر أو ندبة لو كان شديد، هنا قرار الانتظار براهو ما دايما صاح، لأن العلاج المبكر ممكن يحمي الجلد من آثار ما كان في داعي تحصل
المرحلة الأكتر حساسية هي منتصف الطفولة، من سنة لحدي سبعة سنين، حب الشباب الحقيقي في العمر ده ما شائع، وما بنعاملو كأنو "حبوب أطفال" عادية، لو طفل في العمر ده ظهرت عندو كوميدونات واضحة، بثور متكررة، أو شعر زائد ونمو سريع وعلامات بلوغ مبكر، فهنا لازم ننتبه لاحتمال زيادة أندروجينات أو سبب هرموني، دي منطقة ما بنمشي فيها بالتخمين، بل بتحتاج معاينة وفحوصات حسب الحالة
قبيل المراهقة، من سبعة لحدي اتناشر سنة، ممكن تبدأ الكوميدونات تظهر خصوصا في الجبهة والأنف، أحيانا تكون أول علامة إن الجسم دخل مرحلة الهرمونات الهادية البتسبق البلوغ، وبعدها في المراهقة بيوصل حب الشباب لقمتو، وغالبا يكون مزيج بين رؤوس بيضاء، رؤوس سوداء، وبثور ملتهبة، وهنا التأخير في العلاج هو البفتح الباب للتصبغ والندوب
أما بعد العشرينات والتلاتينات، فحب الشباب ما بكون "مراهقة متأخرة" وخلاص، عند نسوان كتار بظهر كنمط مستمر أو جديد، غالبا حول الذقن والفك، مع تهيج قبال الدورة، وأحيانا يرتبط بمتلازمة المبيض متعدد الكيسات أو بإسمها الجديد Polyendocrine Metabolic Ovarian Syndrome (PMOS) (PCOS) أو حساسية الغدد الدهنية للهرمونات، فهم العمر هنا بيساعدنا نعرف متين نطمئن، ومتين نفتش، ومتين نبدأ علاج جاد
وبعد العمر، في أشكال خاصة من حب الشباب بتتولد من البيئة والاحتكاك والعادات اليومية، ودي حنتكلم عنها في البوست الجاي
#حكاية_حب_الشباب #عيادات_بيت_العافية #عيادة_الجلدية_أون_لاين