واقي الشمس براهو ما بكفي للحماية الكاملة، والمفروض إنو الواقي يكون طبقة واحدة من نظام حماية كامل، فالحماية الميكانيكية بأدوات بسيطة بتدي حماية فعلية أعلى من أي واقي براهو، والقبعة والنضارة والملابس والتوقيت كلها أدوات بتفرق فرق حقيقي في النتيجة على البشرة على المدى الطويل.
نبدأ بالتوقيت، الشمس ما بنفس القوة طول اليوم، الـ UVB في أعلى قوتها بين 10 صباحاً و 4 عصراً، والـ UVA قوية من الصبح للمساء لكن بتزيد ذروتها في نفس الفترة، فلو الزولة بتقدر تنظم خروجها وتتجنب ساعات الذروة، حتقلل من تعرضها للأشعة بنسبة كبيرة جداً، والقاعدة العامة، الخروج قبل 10 الصباح أو بعد 4 العصر بحمي أكتر من أي واقي.
ومن طرق قياس قوة الشمس البسيطة، قاعدة الظل، لو ظلك أقصر من طولك، الشمس قوية وفي ذروتها، ولو ظلك أطول من طولك، الشمس أضعف ومستوى الأشعة أقل، والتطبيقات على الموبايل بتدّينا مؤشر الأشعة فوق البنفسجية (UV Index) في كل دقيقة
القبعة من أقوى أدوات الحماية الميكانيكية، والقبعة الفعالة بمواصفات محددة، حافة عريضة على الأقل (7.5 سم)، تغطي الوش والأضان والرقبة من قدام وورا، قماش غامق ومحبوك بكثافة، القش وبعض القبعات الخفيفة بسمحوا بمرور الأشعة بنسبة كبيرة، أما القبعات المعالجة بحماية UPF 50+ فبتحجب 98% من الأشعة، والقبعة بتحمي مناطق واسعة ما بنصلها بالواقي عادة، خاصة فروة الرأس وأعلى الأضان.
النضارة الشمسية ما إكسسوار، هي حماية أساسية للعين والجلد حواليها، والنضارة الفعالة لازم تكون مكتوب عليها UV 400 أو UV protection 100%، يعني بتحجب كل الأشعة فوق البنفسجية حتى موجة 400 نانومتر، والنضارة الكبيرة (oversized/wraparound) بتحمي الجلد حواليها برضو، والنضارة الرخيصة الملونة بدون حماية UV ممكن تكون أسوأ من عدم استخدامها، لأنها بتقلل الضوء فتتسع الحدقة فبتسمح لأشعة أكتر بالدخول للعين، عشان كده شراء النضارة من مصدر موثوق بمواصفات حقيقية ضروري.
الملابس من أبسط وأقوى وسائل الحماية، والقماش العادي بمتص جزء من الأشعة، والقماش الغامق المحبوك بكثافة بحجب أكتر من 90% من الأشعة، والقماش الفاتح والخفيف بسمح بمرور أشعة كتيرة، والقطن الأبيض الخفيف ممكن يكون UPF 5 فقط، يعني حماية ضعيفة، أما القميص الأسود السميك فبكون UPF 50 أو أكتر، وعادة بنختار الأبيض في الحر فبنفقد جزء كبير من الحماية، البديل قماش خفيف معالج لحماية مدمجة.
والملابس بمواصفات UPF (Ultraviolet Protection Factor) موجودة في الأسواق العالمية، علامات مثل Coolibar و Solbari و UV Skinz متخصصة في الموضوع ده، والملابس دي خفيفة ومريحة في الحر وبتحجب 98% من الأشعة، يعني قميص بأكمام طويلة بحماية UPF 50+ بحمي ذراعك أقوى من أقوى واقي شمس، وأرخص على المدى الطويل، وما بحتاج إعادة مسح.
ومن أدوات الحماية البسيطة، المظلة الشمسية (parasol) عادة قديمة بتعود للظهور بقوة، مظلة سوداء بطبقة UV protective بحجب 99% من الأشعة، وبتعمل ظل متنقل مع الزولة، والمظلة دي شائعة جداً في كوريا واليابان، وبتفرق فرق كبير في حماية الوش من الشمس المباشرة.
وفي حقيقة بنسهى عنها، الظل ما بحمي 100% من الأشعة، الـ UVA بترتد من الأسطح المحيطة (الجدران، الأرض، الموية، الرمل)، يعني حتى في الظل، نسبة من الأشعة بتوصل البشرة، والنسبة دي ممكن توصل لـ 50% من الأشعة الأصلية في بعض المواقف، فالقعاد في الظل بحمي بشكل كبير لكنو ما بدّينا حماية كاملة، والواقي الخفيف يفضل أن يكون مستخدم حتى في الظل المستمر.
في البوست الجاي حندخل في موضوع جديد، الواقي عن طريق الفم، النياسيناميد والبوليبوديوم وحبوب الحماية، وشنو دورها الحقيقي ومتى نستخدمها.
ودمتم بصحة وعافية 🌿
#حكاية_الشمس_والبشرة #عيادات_بيت_العافية #عيادة_الجلدية_أون_لاين