الـ SPF (Sun Protection Factor) معامل الحماية من الشمس، الرقم المكتوب على كل علبة واقي شمس، والمهتمة بوقاية بشرتها بتختار الواقي بناءً على الرقم، بتفتكر إنو الأكبر بحمي أكتر بكتير، والحقيقة العلمية مختلفة كلياً.
الـ SPF أساساً بقيس قوة الواقي ضد نوع واحد من الأشعة وهو الـ UVB، والرقم بقول لينا قدر شنو الواقي ببطّئ ظهور الاحمرار على الجلد لو اتعرض للشمس، فلو الجلد بحصل ليهو حرق في 10 دقائق بلا حماية، الواقي SPF 30 نظرياً بخلي الجلد يقاوم لمدة 300 دقيقة، والواقي SPF 50 لمده 500 دقيقة.
لكن النسبة المئوية للحماية الفعلية مفاجئة، الواقي SPF 15 بصد حوالي 93% من الـ UVB، والـ SPF 30 بصد حوالي 97%، والـ SPF 50 بصد حوالي 98%، والـ SPF 100 بصد حوالي 99%.
يعني الفرق بين SPF 50 و SPF 100 هو واحد في المية بس، والشركات بتسوق للأرقام الكبيرة كأنها ميزة كبرى، والواقع الرقمي بقول إنو القفزة الحقيقية بين 15 و 30، وبعد 50 الزيادات هامشية.
والمشكلة الأكبر إنو الرقم الكبير بدّي إحساس خاطئ بالأمان، فالزولة بتقعد ساعات أطول في الشمس، وبتنسى تعيد المسح، وبتعتقد إنها محمية مية في المية، والواقع إنو ما في واقي بقدر يصد كل الأشعة، وحتى الـ SPF 100 بترك واحد في المية من الـ UVB يدخل، ومع التعرض الطويل بعمل ضرر حقيقي.
والأهم من ده كلو إنو الـ SPF ما بقيس الحماية من الأشعة التانية، يعني الواقي SPF 50 ممكن يكون بطل في صد الـ UVB، وضعيف جداً في صد الـ UVA، وما بحمي من الضوء المرئي إطلاقاً، عشان كده اختيار الواقي بناءً على رقم الـ SPF براهو خطأ كبير.
عشان نقيس الحماية من الـ UVA، في أنظمة تانية موجودة على العلبة، النظام الأوروبي بستخدم قياس UVA-PF (UVA Protection Factor)، والنظام الكوري والياباني بستخدم رمز الـ PA متبوع بعلامات +، وكل ما زادت العلامات زادت الحماية، أعلى تصنيف هو PA++++، والنظام البريطاني بستخدم نجوم بوتس (Boots Star Rating) من نجمة لخمس نجوم.
القاعدة الذهبية اللي أقرتها لجنة الخبراء الدولية في 2021: للبشرة الداكنة لازم يكون الواقي SPF 30 على الأقل، ونسبة الـ SPF للـ UVA-PF أقل من 1.5، يعني لو الـ SPF 50، فالـ UVA-PF لازم يكون 33 على الأقل، وللبشرة الفاتحة لازم SPF 50 على الأقل، ونسبة الـ SPF للـ UVA-PF أقل من 3.
عملياً للسودانية في مناخ السودان أو الخليج، حيث مؤشر الأشعة فوق البنفسجية بوصل لأرقام متطرفة معظم العام، الاختيار الأمثل هو SPF 50+ مع PA++++ (أو UVA-PF عالي)، مع عبارة broad spectrum مكتوبة على العلبة، وعبارة broad spectrum بتعني إنو الواقي بحمي من الـ UVB والـ UVA الاتنين.
النقطة الأخيرة، الرقم الـ SPF بنقاس في المختبر بظروف مثالية، بكمية واقي محددة (2 ملغ لكل سنتيمتر مربع)، وكتير من المستعملات بمسحوا كمية أقل بكتير، وده بنزل الحماية الفعلية بشكل كبير، فحتى الواقي SPF 50 لو اتمسح بكمية قليلة، بقدم حماية فعلية ما بتزيد عن SPF 15 أو 20.
في البوست الجاي حنخش في تفاصيل أنواع الفلاتر الموجودة في واقيات الشمس، الفلاتر المعدنية (الزنك والتيتانيوم) والفلاتر الكيميائية الحديثة، ونرد على ادعاءات السمية والأمان البتنتشر كتير على السوشيال ميديا.
ودمتم بصحة وعافية 🌿
#حكاية_الشمس_والبشرة #عيادات_بيت_العافية #عيادة_الجلدية_أون_لاين