الوردية والصدفية وتساقط الشعر وغيرهم

الوردية والصدفية وتساقط الشعر وغيرهم

القصة هنا أعقد مما تتخيل

"الوردية" أو (Rosacea)، هي من الأمراض الجلدية اللي بتعذب المريض نفسياً قبل جسدياً، لأنو الاحمرار فيها بكون في الوجه بالذات، والوردية ما بس احمرار، ممكن يجي معاها حبوب صغيرة حمراء وبثور بتشبه حب الشباب (النوع الحطاطي البثري أو Papulopustular)، وممكن يجي معاها أوعية دموية ظاهرة في الخدود (Telangiectasia)، وفي الحالات الشديدة الأنف ممكن يتضخم ويتشوه (Rhinophyma).

علاقة الوردية بجرثومة المعدة من المواضيع اللي أثارت اهتمام العلماء بصورة كبيرة في السنوات الأخيرة، في أبحاث استقصائية كتيرة شملت الملايين لقت ارتباط أكبر لناس الوردية مع الجرثومة والأرقام تبدو مقنعة، لكن المشكلة الكبيرة بتبدأ لما نسأل السؤال الحاسم: لو عالجنا الجرثومة، الوردية بتتحسن؟

التجربة الوحيدة عالية الجودة اللي اتعملت (Bamford 1999، تجربة عشوائية مزدوجة التعمية مع دواء وهمي (المعيار الذهبي للسببية)، منشورة في Archives of Dermatology) ما لقت أي فرق بين المجموعة اللي اتعالجت من الجرثومة والمجموعة اللي أخدت حبوب وهمية بعد 60 يوم.

يعني أقوى وأنظف دراسة اتعملت قالت: العلاج ما نفع، وده بتناقض مع دراسات تانية أضعف منهجياً (ما فيها مقارنة بدواء وهمي) لقت تحسن: دراسة إيرانية في 2023 لقت نسبة شفاء 63.9%، ودراسة صالح (Saleh 2017) لقت تحسن في الاحمرار والحبوب والبثور بعد شهرين وستة شهور من العلاج، لكن ما لقت تحسن في الأوعية الدموية الظاهرة أو التضخم.

طيب ليه التناقض ده؟ السبب في "فخ" منهجي كبير اسمه "الإرباك بالمضادات الحيوية

" (Antibiotic Confound). علاج جرثومة المعدة بيشمل مضادات حيوية زي الكلاريثرومايسين (Clarithromycin) والميترونيدازول (Metronidazole)، والمضادات الحيوية دي ذاتها بتستخدم كعلاج مستقل للوردية من غير أي علاقة بالجرثومة، لأنها عندها خصائص مضادة للالتهاب، فلما مريض الوردية ياخد علاج الجرثومة ويتحسن، ما بنقدر نعرف هل التحسن جاء لأنو الجرثومة ماتت، ولا لأنو المضادات الحيوية عالجت الوردية مباشرة بغض النظر عن الجرثومة، وعشان نفك اللغز ده، محتاجين تجارب تستخدم أدوية ما مضادات حيوية في علاج الجرثومة، أو تتابع المرضى لفترة طويلة جداً بعد ما تأثير المضادات الحيوية يروح، والتجارب دي لسه ما اتعملت.

ننتقل للصدفية (Psoriasis). والصدفية زي ما كلنا عارفين مرض مناعي مزمن بيظهر في شكل بقع حمراء مغطاة بقشور فضية، غالباً في الركب والأكواع وفروة الرأس. ثلاثة تحليلات تجميعية اتفقت على وجود علاقة بين H. pylori والصدفية والحاجة المهمة هنا إنو العلاقة بتتركز في الصدفية المتوسطة والشديدة، بينما الصدفية الخفيفة ما بتظهر فيها أي علاقة، يعني كأنو الجرثومة بتشتغل كـ "بنزين" بولع النار اللي أصلاً موجودة

لكن هنا كمان في تحفظ مهم، الباحث يونغ (Yong 2018) لقى حاجة لافتة جداً: الدراسات اللي استخدمت فحص الدم ELISA (اللي بيقيس الأجسام المضادة وبيعكس التعرض السابق للجرثومة حتى لو خلصت) لقت علاقة قوية، بينما الدراسات اللي استخدمت فحص النفس (اللي بكشف العدوى النشطة الحالية) ما لقت أي علاقة ،ده برفع احتمال إنو "الذاكرة المناعية" للتعرض السابق هي اللي بتأثر على الصدفية، مش العدوى النشطة ذاتها، عشان كدة، الصدفية لسه ما عندنا فيها دليل كافي

أخيراً نجي لتساقط الشعر المناعي أو (Alopecia Areata)، وده المرض اللي بيجي في شكل بقع صلعاء مستديرة في الرأس أو الذقن، هنا ما في ولا تجربة علاجية واحدة بينت إنو علاج الجرثومة برجع الشعر، عشان كدة بالنسبة لتساقط الشعر المناعي، العلاقة بالجرثومة لسه ضعيفة ومتناقضة وما بتبرر الفحص الروتيني.

وفي أمراض تانية ليها إشارات في الأبحاث بس الأدلة لسه محدودة جداً: الحزاز المسطح الفموي (Oral Lichen Planus) اللي بيظهر كتقرحات مؤلمة في الفم عنده أعلى نسبة احتمال بين كل الأمراض الجلدية لكن الدراسات قليلة والهوامش واسعة جداً.

وحب الشباب الشديد لقوا فيه ارتباط في دراسات حالات (72.5% إيجابية في مرضى حب الشباب مقارنة بـ 39.2% في الأصحاء) لكن ما في تحليل تجميعي ولا تجارب علاجية، وفرفرية هينوخ شونلاين (Henoch-Schönlein Purpura) عند الأطفال الصينيين عندها أقوى نسبة احتمال وعلاج الجرثومة فيها قلل التكرار بنسبة 62%.

لو جمعنا الصورة كلها ورتبنا الأمراض الجلدية حسب قوة الدليل العلمي على علاقتها بـ H. pylori، حنلقى إنو الأرتيكاريا المزمنة (اللي اتكلمنا عنها البوست الفات) في القمة لوحدها بدليل متوسط القوة، والباقي كله بدليل ضعيف لضعيف جداً، وده ما بيعني إنو العلاقة ما موجودة، لكن بعني إننا محتاجين دراسات أكبر وأقوى عشان نتأكد.

طيب اتكلمنا عن الأمراض اللي الجرثومة ممكن تزيدها. فضل نتكلم عن المفاجأة الكبيرة: الأمراض اللي الجرثومة بتحمي منها، في البوست الجاي حنعرف ليه مريض الأكزيما والربو ممكن يكون أحسن ليه ما يعالج الجرثومة، وكيف إنو قرار العلاج ده لازم يكون "مفصل" على حالة كل مريض.

البوست القادم: المفاجأة.. لما تكون الجرثومة هي اللي بتحميك من الأكزيما والحساسية.

#عيادات_بيت_العافية #عيادة_الجلدية_أون_لاين #جرثومة_المعدة_والجلد