(3/8) كم احتمال أن يورّث الوالد البهاق لأبنائه؟ — الأرقام الحقيقية
في المنشور الفات اتفقنا إن الجينات بتلعب دور، لكنها ما بتعني حتمية الإصابة، وأسي حنخت النقط فوق الحروف ونتكلم بلغة الأرقام المباشرة؛ لأن الأرقام ما بتعرف تجامل، وهي الفيصل الوحيد اللي بيقدر يطمن قلوبنا ويصحح مفاهيمنا الاجتماعية.
عشان نفهم الصورة صاح، خلونا نبدأ من نقطة الصفر للزول العادي، أي شخص طبيعي ما عنده أي تاريخ عائلي لمرض البهاق، احتمال إنه يصاب بالمرض ده في يوم من الأيام هو واحد في المية فقط، يعني شخص واحد من كل مية شخص ممكن يجيهو البهاق بالصدفة أو لأسباب تانية، دي هي القاعدة الأساسية اللي حنقيس عليها، علما بأن بس 17% من المصابين الجدد هم العندهم تاريخ عائلي للمرض!
السيناريو الأول والأكثر حساسية هو لما يكون العريس نفسه، أو العروسة، مصابين بالبهاق، طوالي جرس الإنذار هنا بضرب في العائلة، لكن العلم بيقول إن الاحتمال في الحالة دي، يعني انتقال المرض من أب مصاب أو أم مصابة لأولادهم، برتفع بس لما بين خمسة إلى سبعة في المية
عارف إن الرقم ممكن يخوف الزول في البداية، لكن بالمنطق الرياضي البسيط، احتمال سبعة في المية بيعني إن تلاتة وتسعين طفل من بين كل مية طفل حيتولدوا بصحة تامة وما حيجيهم البهاق نهائياً، حتى لو كان أبوهم أو أمهم مصابين بيهو! تلاتة وتسعين في المية نسبة أمان كافية جداً تخلينا نراجع نفسنا قبل ما نرفض أو نصم عائلة كاملة بالمرض.
طيب، السيناريو التاني؛ إن العريس المتقدم يكون سليم مية المية وما عنده أي أثر للبهاق، لكن أحد أقاربه من الدرجة الأولى زي أبوه أو أمه مصابين، الأسر هنا بتخاف وبتقول ليك "المرض في دمهم"، لكن علمياً الأرقام الدقيقة هنا بتقول إن نسبة الخطر بتنزل بشكل ملحوظ وبتبقى حوالي تلاتة إلى أربعة ونص في المية فقط، يعني نسبة الأمان لأولاده بقت تفوق الخمسة وتسعين في المية، والجينات بتخف وتتخفف مع كل جيل سليم بيعبر.
ولو مشينا أبعد من كدة للسيناريو التالت، وكانت القرابة من الدرجة التانية، يعني العريس سليم، وأبوه وأمه سليمين، لكن جده أو جدته هم الكان عندهم بهاق، في الحالة دي، الخطر بخف لدرجة إنه بقرب جداً من نقطة الصفر أو المعدل الطبيعي بتاع أي زول في الشارع اللي هو واحد لـ اتنين في المية. يعني التخوف هنا بيعتبر حرفياً مجرد وسواس اجتماعي ما عنده أي وزن علمي حقيقي يقيفوا عشانه الناس في طريق زواج ناجح.
لكن المعادلة دي كلها بتتغير تماماً وبتاخد منحنى تاني لو كان كلا الوالدين، الأب والأم الاتنين مع بعض، مصابين بالبهاق، هنا الرقم ما بتضاعف بس، لا، ده بقفز قفزة حادة جداً وبصل لنسبة بتتراوح بين تلاتين إلى أربعين في المية، الفرق الشاسع بين حالة "أحد الوالدين" وحالة "الاثنين معاً" بشرح لينا مفهوم جوهري اسمه "تأثير العتبة المتراكمة".
البهاق بيحتاج مجموعة كبيرة من الجينات تتلم مع بعض عشان تتجاوز "عتبة" معينة ويظهر المرض، ولما يكونوا الأب والأم الاتنين مصابين، الطفل بياخد جرعة جينية مضاعفة بتسهل تخطي العتبة دي.
زي ما هو واضح فالأرقام بتدينا مساحة كبيرة جداً للطمأنينة، وبتورينا إن زواج الشخص السليم اللي في عائلته إصابة هو زواج آمن جداً. لكن في تفصيلة علمية مدهشة؛ هل بتفرق لو البهاق ده جاي من طرف الأم مقارنة بطرف الأب؟ الإجابة حنكتشفها مع بعض في المنشور الجاي.
#عيادة_الجلدية_أون_لاين
#عيادات_بيت_العافية
ملحوظة: فهرس السلسلة مثبت ببوست بأعلى الصفحة