من الأم أم من الأب؟ — نسب خطر القرابة الدقيقة
في البوست الفات شفنا إنو زواج الشخص السليم اللي في عائلته إصابة بيعتبر آمن لدرجة كبيرة، وشفنا كيف النسب بتتغير حسب درجة القرابة، أسي حندخل أعمق شوية في تفاصيل بتهم أي أسرة، وحنطرح سؤال مهم جداً: هل خطر انتقال البهاق بيفرق لو كان الطرف المصاب هو الأم مقارنة بالأب؟
عشان نجاوب على السؤال ده، علماء الوبائيات الجينية بيستخدموا مقياس دقيق جداً اسمه "نسبة خطر التكرار" (λ). المقياس ده ببساطة بحسب لينا كم مرة بكون الشخص العنده صلة قرابة بمريض أكثر عرضة للإصابة بالمرض مقارنة بالزول العادي في الشارع.
لما نعاين للأرقام دي بنلقى مفاجأة علمية حقيقية؛ الخطر ما متساوي أبداً بين الأب والأم، إذا كانت الأم هي المصابة بالبهاق، نسبة خطر التكرار للأبناء بتكون 10.6، يعني الخطر بيزيد بحوالي عشرة أضعاف ونص مقارنة بالعامة، لكن لو كان الأب هو المصاب، النسبة دي بتنزل وبتبقى 6.91 ضعف فقط. الأرقام دي بتأكد لينا بوضوح إنو في انحياز كبير لانتقال المرض عن طريق الأم، ودي ظاهرة معروفة علمياً باسم "الانحياز للانتقال الأمومي".
العلماء ما وقفوا عند الأرقام دي، بل فتشوا عن السبب اللي بخلي الأم تنقل الخطر بنسبة أعلى من الأب، والتفسيرات شملت حاجات معقدة زي دور الحمض النووي الميتوكوندري (واللي نحنا بنورثه من أمهاتنا بس)، وتأثيرات وراثية تانية بتجي من جهة الأم
والأغرب من ده كله ظاهرة علمية اسمها "الخيمرية المكروية بين الأم والجنين". الظاهرة دي بتعني إنو خلال فترة الحمل، في خلايا من الجنين بتعبر المشيمة وبتدخل دم الأم، وممكن كمان خلايا من الأم تمشي للجنين، والتبادل ده ممكن يحفز لاحقاً تفاعل مناعي ذاتي عند الأمهات اللي عندهم أصلاً قابلية جينية للمرض، أو العكس.
طيب، وباقي أفراد العائلة؟ الأرقام الدقيقة بتقول إنو لو الأخ أو الأخت مصابين، نسبة خطر التكرار بتكون حوالي 12.0 ضعفاً للطفل، أما الفئة اللي بتحمل أعلى نسبة خطر على الإطلاق فهم "الأبناء" لوالدين اتنين مصابين، ونسبة الخطر عندهم بتصل لحوالي 36.0 ضعفاً
لكن، وهنا النقطة المفصلية اللي لازم نركز فيها كويس؛ حتى لو قلنا الخطر 36 ضعف، فنحنا بنضرب الـ 36 دي في النسبة الأساسية اللي هي 1%، يعني في أسوأ السيناريوهات الاحتمال ما زال 36% بس، وما هو حتمية إصابة، ودي نفس النسبة اللاقتنا في المنشور الفات.
ولو رجعنا لورا شوية وشفنا الأقارب من الدرجة التانية، حنلقى إنو حتى هنا في تفصيل دقيق، لو الجدة من جهة الأب هي المصابة، نسبة الخطر للأحفاد بتكون 4.74 أضعاف المعدل الطبيعي، أما لو كان الجد من جهة الأب هو المصاب، فالنسبة بتنزل لـ 3.05 أضعاف بس.
الخلاصة من الأرقام دي كلها إنها بتأكد وجود خطر فعلي، لكنه في النهاية خطر منضبط، قابل للحساب، وممكن نفهمه ونتعامل معاه، وما مفروض أبداً يكون حكم بالإصابة الحتمية اللي بتخلينا نرفض نسب عائلات كاملة، وفي المنشور الجاي، حنعرف تفصيلة تانية بتغير كل الحسابات دي؛ لأن البهاق ذاته ما نوع واحد، ونوع البهاق اللي عند الأهل بفرق كتير في توريثه
#عيادة_الجلدية_أون_لاين
#عيادات_بيت_العافية
ملحوظة: فهرس السلسلة مثبت ببوست بأعلى الصفحة