في البوست الفات اتكلمنا عن التحدي بين الصدفية والإكزيما، الليلة حنفتح ملف بمس تقريباً كل بيت سوداني؛ وهو علاقة مرض السكري بجلد القدمين، فالسكري مرض بـ "يرسم" علاماته بوضوح على الجلد، لدرجة إنو حوالي 30% من مرضى السكري بعانو من مظاهر ومشاكل جلدية، وأبرزها وأخطرها هي سماكة جلد القدمين.
القصة هنا ما قصة كالو عادي أو ثفن اتكون بسبب المشي، القصة وراها "ثالوث كارثي" بيضرب شبكة الأعصاب في الكراع وبيحولها لبيئة خصبة جداً للمضاعفات، وعشان نفهم الثالوث ده بيشتغل كيف، لازم نعرف إنو السكر العالي لفترات طويلة بيبدأ يتلف الأعصاب بتلاتة طرق متوازية:
أول حاجة بيضرب الأعصاب الحسية، فالمريض بيفقد الإحساس بالألم تدريجياً، يعني ممكن يلبس جزمة ضيقة جداً أو يمشي على حاجة حادة وتعمل ليهو احتكاك وسُماكة وهو ما حاسي بأي وجع عشان يغير طريقة مشيتو أو ينتبه.
تاني حاجة، السكري بيضرب الأعصاب الحركية، وده بيعمل ضعف في عضلات القدم الصغيرة وبيخلي الأصابع تتشوه وتتني، وتغيير "هندسة" العظام دي بيخلي وزن الجسم كلو يتركز في نقاط ضغط خطيرة وجديدة.
وتالت حاجة، إنو بيضرب الأعصاب اللاإرادية المسؤولة عن تشغيل غدد العرق، فالكراع بتفقد ترطيبها الطبيعي وبتبقى جافة شديد وقاسية، ومع الضغط طوالي بتبدأ تتشقق وتتصدع.
غير الثالوث ده، السكري نفسو بيعمل تغيير كيميائي جوا الجلد؛ جزيئات السكر العالية بتتحد مع بروتينات الجلد وبتنتج مركبات اسمها (AGEs)، المركبات دي بتضرب الكولاجين بتصلبو وبتخلي الجلد نفسه سميك، مشدود، وفاقد لمرونتو، ودي حالة بنسميها طبياً "الجلد السميك السكري".
ومرات بنشوف علامات تانية في العيادة بتنبهنا طوالي لوجود مقاومة أنسولين أو سكري غير منتظم، زي السواد والخشونة البتظهر في الرقبة وثنايا الجسم، أو ظهور حبيبات صغيرة فوق مفاصل أصابع اليد، أو حتى سُماكة في باطن الكف بتخلي الجلد مجعد وخشن زي شكل "الكرشة" (Tripe palms).
الخطورة الحقيقية والمأساة بتحصل لما يتكون الكالو أو الثفن في قدم مريض السكري وما يلقى اهتمام، الكالو ده بيكون قاسي جداً وبشتغل زي الحجر المدفون تحت الجلد، ومع كل خطوة بضغط على الأنسجة التحتو لحدي ما يحصل نزيف داخلي ما بتشاف، ثم يتحول لقرحة، والقرحة لو التهبت ممكن لا قدر الله تنتهي بدخول المستشفى أو البتر.
عشان كدة، رسالتنا الليلة لكل مريض سكري ولكل زول عندو زول كبير في البيت: أفحص كراعك يومياً قبل النوم فده أهم من فحص السكر نفسو، ولو لقيت أي كالو أو سُماكة أو تشقق ، ده ما موضوع تجميلي تمشي تحكو بحجر خفاف أو موس في البيت، ده جرس إنذار بستدعي زيارة فورية للطبيب.
في البوست الجاي، حنتكلم عن غدة صغيرة في رقبتك، لما تكسل، بتخلي أجهزة جسمك كلها تبطئ، وجلدك يتراكم ويبقى سميك وجاف.
#عيادات_بيت_العافية
#عيادة_الجلدية_أون_لاين